सायबर हल्ल्याचा कला रसिकांनाही फटका

जहांगिर आर्ट गॅलरीची वेबसाइट दोन महिन्यांनंतरही बंदच

म. टा. खास प्रतिनिधी, मुंबई

एप्रिल महिन्याच्या अखेरीस जहांग‌रि आर्ट गॅलरीच्या वेबसाइटवर सायबर हल्ला झाला. या हल्ल्यानंतर दोन महिने उलटून गेले तरी ही वेबसाइट अजूनही सुरू झालेली नाही. त्यामुळे जहांग‌रि आर्ट गॅलरीमध्ये नेमके कोणते उपक्रम सुरू आहेत, कोणाचे प्रदर्शन आयोजित करण्यात आले आहे याची माहिती रसिकांपर्यंत पोहोचत नाही. ही वेबसाइट सध्या स्पॉन्सरच्या प्रतीक्षेत खोळंबली आहे. त्यामुळे त्याचे काम पूर्ववत व्हायला किमान महिना तरी लागेल, असे जहांगीर आर्ट गॅलरीकडून सांगण्यात येत आहे.

एप्रिलमध्ये जहांग‌रि आर्ट गॅलरीची वेबसाइट हॅक झाली. या वेबसाइटवर हिटलर आणि कृष्णवर्णियांसंदर्भात आक्षेपार्ह मजकूर दिसू लागला. त्यानंतर ही वेबसाइट बंद करून त्यावर अवर वेबसाइट इज करंटली अंडर कन्स्ट्रक्शन असा संदेश देण्यात आला. सध्या जहांग‌रि आर्ट गॅलरीची वेबसाइट इंटरनेटवर थेट सर्च करून अजिबात दिसत नाही. या वेबसाइटवरील सर्व मजकूर पुन्हा अपडेट करण्यासाठी प्रयत्न करण्यात येत होते तरी त्यात अडचण येत होती. त्यामुळे विलंब लागल्याची माहिती गॅलरीच्या सचिव के. जी. मेनन यांनी दिली. आता ही वेबसाइट पूर्ण तयार असून स्पॉन्सरची प्रतीक्षा असल्याचेही त्यांनी सांगितले.

टाटा ग्रुपने या आधी ही वेबसाइट स्पॉन्सर केली होती. त्यामुळे त्यांच्याशी यासंदर्भात बोलणी सुरू असून आज, बुधवारी टाटाच्या पदाधिकाऱ्यांशी चर्चा होण्याची शक्यता आहे. त्यानंतर टाटा पुन्हा ही वेबसाइट स्पॉन्सर करणार का, याबद्दल नेमकी माहिती मिळू शकेल. त्यांना पत्र पाठवले असून निधी उपलब्ध झाला की एका महिन्याच्या कालावधीमध्ये ही वेबसाइट पुन्हा रसिकांना पाहायला मिळू शकेल.

दरम्यान, अजूनही ही वेबसाइट नेमकी कुठून हॅक झाली होती त्याची माहिती मिळाली नसल्याचे मेनन यांनी सांगितले.

ई-मेलचा आधार

वेबसाइट बंद केल्यानंतर गेल्या दोन महिन्यांत चित्रकार, कलाकार आणि ग्राहक यांच्या गॅलरीकडे असलेल्या मेलिंग लिस्टवरून दर आठवड्याला आगामी प्रदर्शनाबद्दल माहिती दिली जात होती. गॅलरीचे फेसबुक पेजही आहे. मात्र आगामी प्रदर्शनांबद्दल दरवेळी अद्ययावत माहिती या पेजवर उपलब्ध होत नाही. त्यामुळे या माध्यमातूनही रसिकांना नेमक्या प्रदर्शनांचा अंदाज येत नव्हता.