म. टा. खास प्रतिनिधी, मुंबई
वयाच्या ८०व्या वर्षीही जयंत सावरकर आपली तब्येत राखून आहेत. एक कलाकार म्हणून घ्यायची ती सर्व काळजी ते घेत असतात. इतकेच नव्हे, तर या वयातही नाटकाच्या प्रत्येक प्रयोगानंतर ते कलाकारांसोबत नाटकाची चर्चा करतात. प्रयोग अजून कसा चांगला होईल, यासाठीची ती धडपड असते. मराठी कलाकारांनी त्यांचा आदर्श घ्यायला हवा, असे गौरवोद्गार अभिनेते विक्रम गोखले यांनी काढले. चतुरंग प्रतिष्ठानतर्फे शनिवारी ज्येष्ठ अभिनेते जयंत सावरकर यांचा सन्मान विक्रम गोखले यांच्या हस्ते झाला. त्यावेळी ते बोलत होते.
रवींद्र नाट्य मंदिरात शनिवारी तुडुंब गर्दी झाली होती. गेली ६० वर्षे सिनेमा, नाट्य व टीव्ही या माध्यमांत अभिमानी मुशाफिरी करणाऱ्या जयंत सावरकर यांचा सन्मान ‘याची देही..’ अनुभवण्यासाठी ही गर्दी होती. या कार्यक्रमाची सुरुवात नांदीने झाली. खरेतर ज्या व्यक्तीचा सन्मान करायचा, ती व्यक्ती या कार्यक्रमात प्रत्यक्ष सहभागी नसते. परंतु सावरकर याला अपवाद होते. या नंदीनंतर अंतू बरवा आणि तळीराम हे दोन प्रसंग त्यांनी त्याच ऊर्जेने सादर केले. त्यानंतर विक्रम गोखले यांच्या हस्ते त्यांचा सन्मान करण्यात आला. मानपत्र, भेटवस्तू व मानवस्त्र असे त्याचे स्वरूप होते.
यावेळी सावरकर यांच्या ‘मी एक छोटा माणूस’ या आत्मकथनपर पुस्तकाचे प्रकाशनही अभिनेते शरद पोंक्षे यांच्या हस्ते करण्यात आले. यावेळी बोलताना पोंक्षे म्हणाले, ' सावरकर आणि गरिबी, कष्ट हे नाते अतूट आहे. पण या सावरकरांना रसिक प्रेक्षकांच्या प्रेमाची श्रीमंती लाभली.'
या प्रकाशनानंतर मुलाखतकार सुधीर गाडगीळ यांनी सावरकर यांची मुलाखतही घेतली. यावेळी संगीत नाटकांपासून मराठी नाटके, हिंदी सिनेमा अशा मोठ्या प्रवासातले अनुभव त्यांनी सांगितले. यातले अनेक किस्से सांगून इतक्या वर्षांच्या कामातून पदरी जमलेली अनुभवाची शिदोरी उलगडून दाखवली. सिनेनाट्य सृष्टीतील अनेक मान्यवर यावेळी उपस्थित होते.
सावरकर यांचे सहस्रचंद्र दर्शन तसेच त्यांच्या अभिनय कारकिर्दीला झालेली ६० वर्षे यांचे औचित्य साधून चतुरंग प्रतिष्ठानने या हृद्य कार्यक्रमाचे आयोजन केले होते.
वयाच्या ८०व्या वर्षीही जयंत सावरकर आपली तब्येत राखून आहेत. एक कलाकार म्हणून घ्यायची ती सर्व काळजी ते घेत असतात. इतकेच नव्हे, तर या वयातही नाटकाच्या प्रत्येक प्रयोगानंतर ते कलाकारांसोबत नाटकाची चर्चा करतात. प्रयोग अजून कसा चांगला होईल, यासाठीची ती धडपड असते. मराठी कलाकारांनी त्यांचा आदर्श घ्यायला हवा, असे गौरवोद्गार अभिनेते विक्रम गोखले यांनी काढले. चतुरंग प्रतिष्ठानतर्फे शनिवारी ज्येष्ठ अभिनेते जयंत सावरकर यांचा सन्मान विक्रम गोखले यांच्या हस्ते झाला. त्यावेळी ते बोलत होते.
रवींद्र नाट्य मंदिरात शनिवारी तुडुंब गर्दी झाली होती. गेली ६० वर्षे सिनेमा, नाट्य व टीव्ही या माध्यमांत अभिमानी मुशाफिरी करणाऱ्या जयंत सावरकर यांचा सन्मान ‘याची देही..’ अनुभवण्यासाठी ही गर्दी होती. या कार्यक्रमाची सुरुवात नांदीने झाली. खरेतर ज्या व्यक्तीचा सन्मान करायचा, ती व्यक्ती या कार्यक्रमात प्रत्यक्ष सहभागी नसते. परंतु सावरकर याला अपवाद होते. या नंदीनंतर अंतू बरवा आणि तळीराम हे दोन प्रसंग त्यांनी त्याच ऊर्जेने सादर केले. त्यानंतर विक्रम गोखले यांच्या हस्ते त्यांचा सन्मान करण्यात आला. मानपत्र, भेटवस्तू व मानवस्त्र असे त्याचे स्वरूप होते.
यावेळी सावरकर यांच्या ‘मी एक छोटा माणूस’ या आत्मकथनपर पुस्तकाचे प्रकाशनही अभिनेते शरद पोंक्षे यांच्या हस्ते करण्यात आले. यावेळी बोलताना पोंक्षे म्हणाले, ' सावरकर आणि गरिबी, कष्ट हे नाते अतूट आहे. पण या सावरकरांना रसिक प्रेक्षकांच्या प्रेमाची श्रीमंती लाभली.'
या प्रकाशनानंतर मुलाखतकार सुधीर गाडगीळ यांनी सावरकर यांची मुलाखतही घेतली. यावेळी संगीत नाटकांपासून मराठी नाटके, हिंदी सिनेमा अशा मोठ्या प्रवासातले अनुभव त्यांनी सांगितले. यातले अनेक किस्से सांगून इतक्या वर्षांच्या कामातून पदरी जमलेली अनुभवाची शिदोरी उलगडून दाखवली. सिनेनाट्य सृष्टीतील अनेक मान्यवर यावेळी उपस्थित होते.
सावरकर यांचे सहस्रचंद्र दर्शन तसेच त्यांच्या अभिनय कारकिर्दीला झालेली ६० वर्षे यांचे औचित्य साधून चतुरंग प्रतिष्ठानने या हृद्य कार्यक्रमाचे आयोजन केले होते.