म. टा. प्रतिनिधी, मुंबई भीषण आर्थिक संकटातील जेट एअरवेजमधील शैलेश सिंह (५३) या कर्मचाऱ्याने शुक्रवारी आत्महत्या केली. ते जेटमध्ये टेक्निशियन होते. या श्रेणीतील कर्मचाऱ्यांना फेब्रुवारीपासून पगार मिळालेला नाही. त्यातच शैलेश सिंह यांच्यावर कर्करोगाचे उपचारही सुरू होते. त्यातून आलेल्या नैराश्यातून त्यांनी ही आत्महत्या केल्याचे समजते. शैलेश सिंह हे नालासोपारा पूर्वेच्या ओस्वाल नगरीतील साईपूजा इमारतीत राहत होते. त्यांच्यावर पोटाच्या कर्करोगाचे उपचार सुरू होते. त्यांचा मुलगाही जेटमध्येच ग्राऊंड ऑपरेशन्स विभागात कार्यरत आहे. ग्राऊड ऑपरेटर्सनाही मार्च महिन्याचा पगार मिळालेला नाही. त्यात कंपनीने १५ एप्रिलपासून सर्व उड्डाणे बंद केली आहेत. कंपनीच्या सेवा पूर्ववत होण्याची कुठलीही चिन्हे नाहीत. यातूनच शैलेश निराश झाले होते. मागील आठवड्यातच केमोथेरपी घेऊन ते इस्पितळातून परत आले होते. त्यानंतर त्यांनी शुक्रवारी दुपारी दीडच्या सुमारास राहत्या इमारतीच्या चौथ्या मजल्यावरून उडी मारून आत्महत्या केली. ते इमारतीच्या गच्चीवर गेल्यावर नागरिकांनी पोलिस आणि अग्निशमन दलाला पाचारण केले. मात्र त्यापूर्वीच सिंग यांनी इमारतीवरून खाली असलेल्या नाल्यात उडी मारली. त्यात त्यांचा मृत्यू झाला. याबाबत तुळींज पोलिस ठाण्यात आकस्मिक मृत्यूची नोंद केली आहे. दरम्यान, या आत्महत्येला कंपनी प्रशासन जबाबदार असल्याचा आरोप जेट एअरवेज कर्मचारी असोसिएशनने केला आहे. या आत्महत्येबाबत जेट एअरवेजकडून प्रतिक्रिया आलेली नाही.
जेट एअरवेजच्या कर्मचाऱ्याची आत्महत्या
म टा प्रतिनिधी, मुंबईभीषण आर्थिक संकटातील जेट एअरवेजमधील शैलेश सिंह (५३) या कर्मचाऱ्याने शुक्रवारी आत्महत्या केली ते जेटमध्ये टेक्निशियन होते...
MT 28 Apr 2019, 4:00 am