रविवारी 'जम्बोब्लॉक'

म. टा. खास प्रतिनिधी, मुंबई

मध्य रेल्वेवरील कल्याणचा १०० वर्षे जुना पत्री पूल पाडण्यासाठी येत्या रविवारी सहा तासांचा ब्लॉक घेण्याचा निर्णय घेण्यात आला आहे. त्यामुळे मध्य रेल्वेच्या प्रवाशांसाठी रविवारचा रेल्वे प्रवास कटकटीचा आणि त्रासाचा ठरणार आहे. यामुळे सुमारे १४० फेऱ्या रद्द होणार असून, ४० मेल, एक्स्प्रेसच्या वेळापत्रकांवर परिणाम होणार आहे.

पत्री पूल वाहतुकीच्या दृष्टीने असुरक्षित घोषित केल्यानंतर त्यावरील वाहतूक पूर्णपणे बंद आहे. पत्री पुलाच्या बाजूला नवा पूल बांधून त्यावरून वाहतूक सुरू ठेवण्यात आली आहे. हा पूल पाडण्याच्या दृष्टीने वेळापत्रक आखले जात आहे. मध्य रेल्वेकडून रविवारी सकाळी ८ ते ९.३०पासून ब्लॉकचे नियोजन केले जात आहे. यामुळे मुख्यत: ठाणे ते कल्याणदरम्यानच्या लोकल फेऱ्यांवर सर्वाधिक परिणाम होणार आहे. याशिवाय मुंबई ते नाशिक, मुंबई ते पुणेदरम्यानच्या मेल व एक्स्प्रेसचे वेळापत्रकही कोलमडणार आहे. ब्लॉक कालावधीत सीएसएमटी ते डोंबिवली, कर्जत-कसारा ते कल्याणपर्यंत सेवा चालतील. त्यामुळे हजारो प्रवाशांना ब्लॉक कालावधीत रस्ते वाहतुकीचा पर्याय निवडावा लागणार आहे.

- कल्याणचा पत्री पूल पाडणार

- रेल्वेचा सहा तासांचा ब्लॉक

- १४० लोकलफेऱ्या रद्द होणार