मुंबईकरांची कोंडी आजपासून फुटणार; जेव्हीएलआर पुलाचे काम पूर्ण

म. टा. प्रतिनिधी, मुंबई : पूर्व द्रुतगती मार्ग आणि जोगेश्वरी-विक्रोळी लिंक रस्त्यावर (जेव्हीएलआर) गेल्या आठवडाभरापासून होणाऱ्या वाहतूककोंडीतून नागरिकांची सुटका होणार आहे. पूर्व द्रुतगती महामार्गावरील जेव्हीएलआर पुलाच्या दुरुस्तीचे काम पूर्ण झाले असून आज, रविवारपासून हा पूल वाहतुकीसाठी खुला केला जाणार आहे, अशी माहिती महाराष्ट्र राज्य रस्ते विकास महामंडळाच्या (एमएसआरडीसी) अधिकाऱ्यांनी दिली.

पूर्व-पश्चिम उपनगरांना जोडण्यासाठी जेव्हीएलआर उड्डाणपूल महत्त्वपूर्ण आहे. या पुलाचे सांधे खराब झाल्याने ते बदलण्याचे काम एमएसआरडीसीने हाती घेतले होते. १३ ते २४ मे या दरम्यान हे दुरुस्तीचे काम करण्यासाठी प्रशासनाने परवानगी घेतली होती. त्यासाठी उड्डाणपूल बंद करण्यात आला होता. तर बाजूच्या निमुळत्या मार्गावरून वाहतूक सुरू होती. मात्र वाहनांच्या संख्येच्या तुलनेत हा रस्ता खूपच लहान आहे. यामुळे या भागात गेल्या शनिवारपासून मोठी वाहतूककोंडी होत होती. पूर्व द्रुतगती मार्गावर कांजूरमार्ग ते घाटकोपरपर्यंत, तर जेव्हीएलआरवर पवईपर्यंत वाहनांच्या लांबलचक रांगा लागत होत्या. त्यातून वाट काढताना मुंबईकरांना मोठ्या त्रासाला सामोरे जावे लागत होते. अर्ध्या तासाच्या प्रवासासाठी दोन ते तीन तास अडकून राहावे लागत होते. कार्यालयात अथवा इच्छितस्थळी पोहोचण्यात विलंब होत असल्याने नागरिकांनी सोशल मीडियावर रोषही व्यक्त केला. नागरिकांना होणारा हा त्रास कमी करण्यासाठी एमएसआरडीसीने पुलाचे काम जलदगतीने शनिवारपर्यंत पूर्ण केले. मागून घेतलेल्या कालावधीच्या दोन दिवस आधीच रविवारी पूल वाहतुकीसाठी खुला केला जाणार आहे. यामुळे नागरिकांना दिलासा मिळणार आहे.

काम लवकर करण्यासाठी अतिरिक्त यंत्रणा

'पुलाचे काम लवकर पूर्ण करण्यासाठी अतिरिक्त कर्मचारी आणि यंत्रणा लावण्यात आली. शनिवारी पुलाचे काम पूर्ण झाले. काँक्रिटचा क्रुरिंग कालावधी पूर्ण करून रविवारी सकाळी पूल वाहतुकीसाठी खुला केला जात आहे. दोन दिवस आधीच पुलाचे काम पूर्ण करण्यात आले,' अशी माहिती एमएसआरडीसीचे मुख्य अभियंता शशिकांत सोनटक्के यांनी दिली.