मुंबई आग दुर्घटना: दुसरा एफआयआर दाखल

मुंबई: कमला मिल्स कम्पाउंडमधील भीषण आग दुर्घटनेप्रकरणी मुंबई पोलिसांनी एन. एम. जोशी मार्ग पोलीस ठाण्यात दुसरा एफआयआर नोंदवला. हा एफआयआर मुंबई महानगर पालिकेच्या तक्रारीनंतर दाखल करण्यात आला आहे. कमला मिलचे मालक, 'वन अबव्ह' आणि 'मोजोस बिस्ट्रो' यांनी महाराष्ट्र प्रादेशिक नगररचना अधिनियमाचे उल्लंघन ( एमआरटीपी) केल्याचे महापालिकेने आपल्या तक्रारीत म्हटले आहे.

या कारवाईपूर्वी पोलिसांनी 'वन अबव्ह' पबच्या दोन मालकांविरुद्ध लुकआऊट नोटीस बजावली होती. ही आग नेमकी कशामुळे लागली याबाबतचा तपास सुरू आहे. बार टेंडरने केलेल्या फायर स्टंटमुळे, किंवा हुक्क्यासाठी जाळलेल्या कोळशामुळे, वा शॉर्ट सर्किटमुळे ही आग लागली असावी असा अंदाज बांधला जात आहे.

हितेश संघवी आणि जिगर संघवी हे दोघे वन अबव्ह पबचे सहमालक असून हे दोघे हा पब सी-ग्रेड सुविधा देत चालवत होते अशी माहिती एका वरिष्ठ पोलीस अधिकाऱ्याने दिली. याअगोदर पोलिसांनी संघवीबंधूंसह अभिजित मानकर आणि इतर काही लोकांविरुद्ध गुन्हा नोंदवला होता. हा गुन्हा आयपीसी कलम ३०४ (खून). ३३७ ( एखाद्याचा जीव धोक्यात घालणे) आणि ३३८ ( एखाद्याला इजा पोहोचवणे) अशा कलमांखाली नोंदवण्यात आला होता.

दुसरीकडे मात्र पबने आपली काहीच चूक नसल्याचे म्हटले आहे. आपण सर्व सुरक्षा नियमांचे पालन केल्याचेही पबचे म्हणणे आहे. ही दुर्घटना मोजोस बिस्ट्रोमुळे झाल्याचे 'वन अबव्ह'चे म्हणणे आहे.