बेपत्ता मुलीचा पेच कायम! पालक म्हणतात बेपत्ता; पोलिसांचा मात्र वेगळाच दावा

जव्हार : जव्हार मोखाडा तालुक्यातील कातकरी आदिवासी कुटुंबाची फरफट अद्यापही सुरू आहे. दोन धनदांडग्यांनी नगर जिल्ह्यातील तळेगाव येथे जव्हारच्या दोन अल्पवयीन मुलींना किरकोळ पैशांत गहाण ठेवून वेठबिगार म्हणून राबवले. मात्र य़ा प्रकरणी नवा पेच समोर आले आहे. कुटुंबाच्या म्हणण्यानुसार सहा वर्षीय मुलगी ही अद्याप घरी आलेली नाही. तर तिच्या मोठ्या बहिणीच्या म्हणण्यानुसार ती अन्यत्र आहे. पोलिस प्रशासनाने मात्र छोटी मुलगीही पालकांकडेच आहे, असा दावा केला आहे.

श्रमजीवी संघटनेचे तालुका अध्यक्ष संतोष धिंडा यांनी पीडित कुटुंबाला मंगळवारी तातडीने तहसील कार्यालयाकडून अंत्योदय रेशन कार्ड मिळवून दिले. त्यांचे जातीचे दाखले मिळविण्यासाठी अर्ज केला व इतर कागदपत्रे मिळवण्यासाठी त्यांना मदत केली. 'मंगळवारी दिवसभर कार्यालयीन कामकाज करून सायंकाळी मी पीडित कुटुंबीयांच्या घरी गेलो, त्यावेळी तेथे मोठी मुलगी होती. मात्र छोटी मुलगी नव्हती. तिच्या शोधासाठी आम्ही प्रयत्न करत आहोत', असे धिंडा यांनी स्पष्ट केले. दुसरीकडे दोन्ही मुली पालकांच्या ताब्यात आहेत. आरोपींबाबत पुढील तपास सहाय्यक पोलिस निरीक्षक अहिरराव करीत असल्याची माहिती जव्हार पोलिस ठाण्याचे पोलिस निरीक्षक आप्पासाहेब लेंगरे यांनी दिली.