म. टा. विशेष प्रतिनिधी, मुंबई
पालिका तसेच सार्वजनिक रुग्णालयामध्ये जळीत रुग्णांवर वैद्यकीय उपचार करण्यासाठी त्वचेची तीव्र निकड लक्षात घेऊन आता केईएम रुग्णालयामध्ये लवकरच त्वचापेढी( स्किन बँक )सुरू करण्यात येणार आहे. अवयवदानासाठी काम करणाऱ्या विभागीय अवयव आणि ऊती प्रत्यारोपण आणि राज्य अवयव आणि ऊती प्रत्यारोपण समितीच्या माध्यमातून ही बँक उभारण्यात येणार आहे. केईएम रुग्णालय प्रशासनाकडून मिळालेल्या माहितीनुसार या त्वचापेढीला लाभ केवळ मुंबईतील नव्हे तर राज्याच्या कानाकोपऱ्यातून येणाऱ्या जळीत रुग्णांना मिळणार आहे.
रुग्णालयामध्ये प्रत्येक दिवसाला दोन ते तीन जळीत रुग्ण येतात. लो. टिळक रुग्णालयामध्ये जळीत रुग्णांवर यशस्वी उपचार पद्धती विकसित करण्यात आली आहे. त्याचप्रमाणे केईएम रुग्णालयामध्येही या त्वचापेढीच्या मदतीने रुग्णांवर उपचार करणे, त्यांच्यावर नव्या त्वचेचे रोपण करणे सुसह्य होणार आहे. भाजल्यानंतर अनेकदा त्वचा उघडी पडते. त्यातून संसर्ग होण्याची शक्यता वेगाने वाढते. हा संसर्ग रोखण्यासाठी त्वचेवर आच्छादन करणे गरजेचे असते. मात्र, योग्यवेळी त्वचारोपण करण्यासाठी त्वचापेढीमध्ये त्वचा असणे गरजेचे असते. त्यामुळे इतर कोणत्या पेढीवर अवलंबून राहण्यापेक्षा रुग्णालयामध्येच त्वचापेढी उपलब्ध केली तर रुग्णांची ही गरज पूर्ण होणार आहे. या संदर्भातील काम अंतिम टप्प्यात आले असून काही प्रशासकीय संमती मिळाल्यानंतर या पेढीचे काम सुरू होणार आहे.
अवयवप्रत्यारोपण तसेच अवयवदानाविषयी सर्वसामान्यांमध्ये असणारी जाणीवजागृती वेगाने वाढते आहे. मात्र अद्याप त्वचापेढीच्या संदर्भात सामान्यांमध्ये तितकीशी जाणीवजागृती नाही. त्यामुळे इच्छा असूनही त्वचा नेमकी कुठे दान करावी हे कळत नाही. लो. टिळक रुगणालयामध्ये येणारे रुग्ण हे मुंबईसह राज्याच्या काही भागातूनही येतात. त्वचा जळल्यामुळे होणाऱ्या वेदना तीव्र स्वरूपाच्या असतात. त्या भरून आल्या तरी व्रण मागे राहिल्याने आत्मविश्वास डळमळतो. त्यामुळे रुग्णांना दिलासा देण्यासाठी त्वचापेढीची नितांत आवश्यकता आहे. केईएम रुग्णालयामध्ये सुरू होणाऱ्या पेढीच्या रूपाने अनेक जळीत रुग्णांना दिलासा मिळू शकेल.