'उद्धव ठाकरेंचे ७ कंपन्यांशी आर्थिक लागेबांधे'

मटा ऑनलाइन वृत्त । मुंबई

महापालिकेतील भ्रष्टाचारावरून शिवसेनेवर सतत टीका करणाऱ्या भाजप खासदार किरीट सोमय्या यांनी आता थेट शिवसेना पक्षप्रमुख उद्धव ठाकरे यांच्यावरच हल्ला चढवला आहे. उद्धव ठाकरे यांचे ७ कंपन्यांशी आर्थिक लागेबांधे आहेत, असा सनसनाटी आरोप किरीट सोमय्या यांनी केला आहे. मी माझी संपत्ती वेबसाईटवर प्रसिद्ध केली असून उद्धव ठाकरे यांनीही आपली संपत्ती जाहीर करावी, असे आव्हान किरीट सोमय्या यांनी उद्धव ठाकरे यांना दिले आहेत.

जगमंद्री फिनवेस्ट प्रायव्हेट लिमिटेड, किम इलेक्ट्रॉनिक्स, जेपीके ट्रेडिंग, लेक्सस इंफोटेक, रिगलगोल्ड ट्रेंडिंग को-ऑपरेटिव्ह प्रायव्हेट लिमिटेड, व्हॅनगार्ड ज्वेल्स लि., यश ज्वेल्स लि. या सात कंपन्यांमध्ये उद्धव ठाकरे यांचे आर्थिक लागेबांधे आहेत, असा आरोप सोमय्या यांनी केला आहे. सात कंपन्यांपैकी दोन कंपन्यांवर सेबीने बंदी घातली असून दोन कंपन्यांमध्ये छगन भुजबऴांनी पैसे गुंतवले असल्याचे सोमय्या म्हणाले. शिवाय पंतप्रधान मोदींनी बोगस कंपन्यांविरोधात टास्क फार्स नेमला म्हणून उद्धव ठाकरे मोदींवर टीका करत असल्याचा आरोपही सोमय्या यांनी यावेळी केला.

मी माझी संपत्ती वेबसाईटवर जाहीर केली आहे. त्यामुळे उद्धव ठाकरेंनी आपली संपत्ती जाहीर करावी, असे सोमय्या म्हणाले. उद्धव ठाकरेंनी स्पष्टीकरण दिलं नाही तर सर्व कागदपत्र प्रसारमाध्यमांना देणार असल्याचा इशारा सोमय्या यांनी यावेळी दिला. त्यामुऴे आता उद्धव ठाकरे आपल्या सभेत सोमय्यांच्या आरोपांना काय उत्तर देतात याकडे अनेकांचे लक्ष लागले आहे.
I disclose my Financial A/C Now @uddhavthackrey should disclose his A/C & clarify about money laundering transaction of 7 Co's @BJP4India pic.twitter.com/mwLW5SyMve — Kirit Somaiya (@KiritSomaiya) February 13, 2017