पावसाळ्यासाठी कोकण रेल्वे सज्ज

पावसाळा जवळ येत असल्याने कोकण रेल्वेने या काळासाठी विशेष वेळापत्रक तयार केले आहे. त्यानुसार पावसाळ्यात गाड्यांचा वेग मर्यादित होणार असून, प्रवासवेळेत वाढ होणार आहे. याशिवाय कोणतीही अनुचित घटना घडू नये, यासाठी रेल्वेकडून विशेष दक्षता घेण्यात येणार आहे.

विशेष वेळापत्रक पावसाळ्यात कोकण रेल्वे मार्गावर निर्माण होणाऱ्या अडचणींच्या पार्श्वभूमीवर ​दरवर्षी विशेष वेळापत्रक तयार केले जाते. त्यानुसार यंदाही रेल्वे प्रशासनाने वेळापत्रकात बदल केला आहे.

सुर​क्षित प्रवासासाठी... सुरक्षित प्रवासाच्या दृष्टीने विविध उपाय करण्यात आले आहेत. प्रामुख्याने रुळांखालील जमीन खचण्याच्या घटना घडू नयेत याकडे विशेष लक्ष दिले जात आहे. निर्विघ्न प्रवासासाठी कोलाड ते ठोकूरपर्यंतच्या मार्गावर ९५० रेल्वे कर्मचारी गस्त घालणार आहेत. दरडी कोसळण्याची शक्यता असणाऱ्या सर्व ठिकाणी २४ तास गस्तीसाठी चौक्या उभारण्यात आल्या आहेत.

साधनसामुग्रीची सज्जता मुसळधार पावसात दृष्यमानता कमी असल्याने चालकांना ४० किमी प्रतितास वेगाने गाडी चालविण्याचे आदेश देण्यात आले आहेत. रत्नागिरी आणि वेरणा (गोवा) येथे अपघातावेळी उपयोगात येणारी गाडी आणि इतर साधनसामुग्रीची सुविधा पुरविली जाणार आहे.

२४ तास नियंत्रण कक्ष प्रवाशांच्या सोयीसाठी बेलापूर, रत्नागिरी आणि मडगाव येथे २४ तास नियंत्रण कक्ष स्थापन करण्यात आले आहेत.

हेल्पलाइन प्रवाशांना १३९ किंवा टोल फ्री क्रमांक १८००२३३१३३२ वर गाड्यांची ​स्थिती समजणार आहे.