भाजपने राणेंसाठी कोकण विधानपरिषदेची जागा सोडली

मुंबई: नगरपरिषदेच्या निवडणुकीत नारायण राणे यांच्या महाराष्ट्र स्वाभिमान पक्षाने नेत्रदीपक यश मिळविल्यानंतर भाजपने नारायण राणेंना आणखी बळ देण्यास सुरुवात केली आहे. त्याचाच एक भाग म्हणून भाजपने कोकण विधानपरिषदेची जागा राणेंच्या महाराष्ट्र स्वाभिमानी पक्षाला सोडली आहे. त्यामुळे या जागेसाठी कोकणात तिरंगी लढत होणार आहे.

भाजपने कोकण विधान परिषदेची जागा लढणार नसल्याचं आज स्पष्ट केलं. ही जागा नारायण राणे यांच्या महाराष्ट्र स्वाभिमानी पक्षाला सोडण्यात आल्याचं आज भाजपने जाहीर केलं. त्यामुळे कोकणात शिवसेना, राष्ट्रवादी आणि महाराष्ट्र स्वाभिमान पक्ष अशी लढत रंगणार आहे. शिवसेनेने राजीव साबळे यांना तर राष्ट्रवादीतून राष्ट्रवादीचे नेते सुनील तटकरे यांच्या कुटुंबीयांपैकीच एखादा सदस्य ही निवडणूक लढविण्याची शक्यता आहे. दरम्यान, शिवसेनेला शह देण्यासाठीच भाजपने राणे यांच्या पक्षाला ही जागा सोडल्याचं बोललं जात आहे. सध्या महाराष्ट्र विधान परिषदेच्या ७८ जागांमध्ये राष्‍ट्रवादी काँग्रेसचे सर्वाधिक २३ आमदार आहेत. तर काँग्रेसचे १९, भाजप १८, शिवसेना ९, अपक्ष ६, लोकभारती १ आणि इतर २ असे आमदार आहेत.