कुलभूषण यांची फाशी माफ करा, आईची मागणी

मटा ऑनलाइन वृत्त । मुंबई

'कुलभूषण जाधव यांची फाशी माफ करा', अशी मागणी जाधव यांच्या आईने पाकिस्तान सरकारकडे केली आहे. कुलभूषण जाधव यांच्या फाशीविरोधात त्यांची आई अवंती सुधीर जाधव यांनी पाकिस्तानच्या अपिलीय कोर्टात अपिल केले आहे. पाकिस्तानच्या लष्करी कायद्यातील कलम १३३ (ब) नुसार कोर्टात हे अपिल करण्यात आले आहे.

पाकच्या रावळपिंडीतील लष्करी कोर्टाने हेरगिरी प्रकरणी जाधव यांना फाशीची शिक्षा सुनावली आहे. यानंतर भारत-पाकमधील संबंध ताणले गेलेत. दरम्यान, कुलभूषण जाधव प्रकरणी वकील देण्याची मागणी भारताने केली होती. पण पाकिस्तानने आज पुन्हा ही मागणी धुडकावून लावली आहे. कुलभूषण जाधववर हेरगिरी प्रकरणी कारवाई झाली आहे. यामुळे द्वीपक्षीय संबंधानुसार जाधवना वकील देता येणार नाही, असं उलट उत्तर पाकने दिलं आहे. जाधव यांना वकील मिळावा यासाठी पाकिस्तानमधील भारताचे उच्चायुक्त गौतम बंबवाले यांनी आज इस्लामाबादमध्ये पाकच्या परराष्ट्र सचिवांची भेट घेतली. जाधव यांच्या फाशीच्या शिक्षेविरोधात अपिल करण्याची मागणीही बंबवाले यांनी या भेटीत केली. पाकिस्तानच्या परराष्ट्र सचिवांनी भारतीय उच्चायुक्त गौतम बंबवाले यांच्या मागण्या फेटाळल्या.

पाक लष्कराने यापूर्वीच कुलभूषण जाधवना वकील देण्यास नकार दिला आहे. अशातच पाक सरकारने पुन्हा भारत सरकारची मागणी फेटाळली. यामुळे पाकिस्तानचे कोर्ट कुलभूषण जाधव यांच्या आईच्या याचिकेवर काय निकाल देणार याकडे आता भारताचं लक्ष आहे.