पालिका रुग्णालयांत १०१ चाचण्या १०० रुपयांत

मुंबई:

महापालिकेच्या रुग्णालयांत गरीबांना विविध आजारांवरील तब्बल १३९ प्रकारच्या रक्तचाचण्या आता विनामूल्य करून मिळणार आहेत. याबाबतच्या प्रस्तावाला बुधवारी स्थायी समितीने मंजुरी दिली. आर्थिक दुर्बल घटकांसाठी ही सुविधा असून, इतर रुग्णांना या चाचण्यांसाठी केवळ ५० ते १०० रु. द्यावे लागणार आहेत. पालिकेची रुग्णालये व प्रसूतिगृहांमध्ये ही सुविधा मिळणार असून, या चाचण्या खासगी प्रयोगशाळांमध्ये होणार आहेत.

मुंबईत पालिकेची केईएम, सायन, नायर, कूपर ही प्रमुख रुग्णालये असून, १६ उपनगरीय व पाच विशेष रुग्णालये आहेत. १७५ दवाखाने व २८ प्रसूतिगृहे आहेत. यामधील प्रमुख रुग्णालयांतील प्रयोगशाळेत मूलभूत आणि प्रगत चाचण्या केल्या जातात. मात्र अनेक चाचण्यांसाठी खासगी लॅबमध्ये दोन ते पाच हजार रुपये खर्च करावे लागतात. या पार्श्वभूमीवर पालिकेच्या रुग्णालयांमध्ये १०१ चाचण्या १०० रुपयांत तर ३८ प्रगत (अ‍ॅडव्हान्स्ड) चाचण्या २०० रुपयांत करण्याचा प्रस्ताव प्रशासनाने स्थायी समितीत मंजुरीसाठी मांडला होता. यावेळी 'बीपीएल' कार्डधारक रुग्णांना ही सेवा मोफत द्यावी आणि इतर रुग्णांना ५० रुपयांचे शुल्क आकारावे, अशी उपसूचना भाजपचे गटनेते मनोज कोटक यांनी मांडली. त्यानंतर बहुमताने हा प्रस्ताव मंजूर झाला.

पूर्व उपनगर...

- चाचण्यांच्या चार वर्षांच्या कंत्राटासाठी पूर्व उपनगरात मेट्रो पॉलिस हेल्थकेअरला काम. चाचण्यांसाठी २६.८६ कोटी रुपये खर्च. आठ उपनगरीय रुग्णालये, ४७ दवाखाने आणि १० प्रसूतिगृहांत सेवा.

पश्चिम उपनगर...

- पश्चिम उपनगरांत थायरोकेअर टेक्नॉलॉजीला काम. चार वर्षांसाठी २९.१४ कोटी रुपये खर्च. यामध्ये ८ उपनगरीय रुग्णालये, ५८ दवाखाने आणि १३ प्रसूतिगृहांत ही सुविधा मिळेल.

मुंबई शहर...

- मुंबई शहरात थायरोकेअर टेक्नॉलॉजीला काम. चार वर्षांसाठी २३.१८ कोटी रुपये खर्च. यामध्ये ५ विशेष रुग्णालये, ७० दवाखाने आणि १० प्रसूतिगृहांत सुविधा.

मटा भूमिका

५० ते १०० रुपयांत खासगी प्रयोगशाळांमधून रक्त चाचण्या करण्याची महापालिकेने निर्माण केलेली सुविधा स्वागतार्ह आहे. पालिकेच्या अनेक रुग्णालयांमध्ये केलेल्या रक्त चाचण्यांवर योग्य प्रक्रिया न केल्याने रक्त वाया जाण्याचे प्रकार घडतात. त्यामुळे रुग्णांना पुन्हा रुग्णालयात येऊन चाचण्या करण्याचा मनस्ताप सहन करावा लागतो. या चाचण्यांच्या निदानावरही प्रश्नचिन्ह निर्माण होते. याचा अर्थ खासगी प्रयोगशाळांमध्ये रक्त चाचण्यांमधून काढलेले निदान उत्तम दर्जाचे असते, असे नाही. मात्र निदान चुकल्यास खासगी प्रयोगशाळांना दंडाची कारवाई असल्याने त्यांच्यावर एकप्रकारे वचक राहणार आहे.