‘मटा’तील वृत्तानंतर पोलिसांनी घेतली दखल
म. टा. प्रतिनिधी, मुंबई
फेसबुकवर अश्लील मेसेज पाठवून त्रास देणाऱ्याविरोधात तक्रार दाखल करण्यासाठी सहा महिने पोलिस ठाण्यात फेऱ्या मारूनही दखल घेतली जात नसल्याबाबत पीडित महिलेने ‘महाराष्ट्र टाइम्स’ कडे दाद मागितली होती. यासंबंधीचे वृत्त प्रसिद्ध होताच अवघ्या २४ तासांत तिची तक्रार नोंदवून घेण्यात आली. विशेष म्हणजे पोलिस आयुक्त दत्ता पडसलगीकर यांनी या प्रकरणात स्वतः लक्ष घालणार असल्याचे सांगितले.
फेसबुकवर एकजण पीडित महिलेसह तिच्या नावे तिच्या मित्रांना अश्लील मेसेज पाठवून त्रास देत होता. एका मित्राने याबाबत कल्पना दिल्यानंतर ही महिला सर्व पुराव्यांसह ५ डिसेंबरला वांद्रे सायबर पोलिस ठाण्यात गेली. मात्र पोलिसांनी या प्रकरणाची गंभीर दखल न घेता वेळोवेळी तिची तक्रार घेण्यास टाळाटाळ केली. या सर्व प्रकारामुळे पीडित महिला मानसिक तणावाखाली होती. अखेर तिने ‘मटा’कडे धाव घेतली. १७ मे रोजी ‘मटा’मधून तिची व्यथा मांडण्यात आली. त्यानंतर २४ तासांत पोलिसांनी गुन्हा नोंदवत तपास सुरू केला. याबद्दल पीडित महिलेने ‘मटा’चे आभार मानले आहेत. दरम्यान, पीडित महिलेने पोलिसांत धाव घेतल्याचे समजताच
आरोपीने फेसबुक अकाऊंटवरील सर्व मॅसेज आणि फोटो डिलीट करून अकाऊंटच बंद केले. त्यामुळे आता पुरावे मिळवणे अवघड जाणार आहे. सायबर पोलिसांनी या प्रकरणाची वेळीच गंभीर दखल घेतली असती तर ही वेळ आली नसती, असे या महिलेचे म्हणणे आहे.