लालबागचा उड्डाणपूल वाहतुकीसाठी बंद

मटा ऑनलाइन वृत्त । मुंबई

लालबाग उड्डाणपुलाच्या एका बाजूस मोठी भेग पडल्यानं या पुलावरील दोन्ही बाजूंची वाहतूक बंद करण्यात आली आहे. या मार्गावरून होणारी वाहतूक सध्या उड्डाणपुलाखालील रस्त्याखालून सुरू असून माटुंग्याकडं जाणारी वाहतूकही वळवण्यात आली आहे. ऐन कामाच्या वेळी वाहतुकीत झालेल्या या बदलांमुळं वाहनचालकांचा चांगलाच गोंधळ उडाला.

लालबागच्या पुलाला भेग पडल्याचं सकाळी साडेसातच्या सुमारास आढळून आलं. हे समजताच एमएमआरडीएच्या अधिकाऱ्यांनी तातडीनं घटनास्थळी जाऊन पुलाची पाहणी केली. खबरदारीचा उपाय म्हणून दोन्ही बाजूकडील वाहतूक बंद करण्यात आली. या भेगा किती मोठ्या आहेत आणि त्यांच्या दुरुस्तीसाठी किती वेळ लागणार आहे हे अद्याप स्पष्ट झालेले नाही. याआधी दोनवेळा पुलाला भेग पडल्याने येथील वाहतूक बंद करण्यात आली होती. दोनही वेळा दुरुस्तीनंतर वाहतूक पुन्हा सुरू करण्यात आली होती.