ज्येष्ठ अभिनेत्री लालन सारंग पंचत्वात विलीन

म. टा. प्रतिनिधी, मुंबई

मराठीसह हिंदी, गुजराती नाट्यसृष्टीवर आपल्या बिनधास्त अभिनयाचा ठसा उमटवणाऱ्या रंगकर्मींपैकी एक नाव म्हणजे लालन सारंग. आपल्या बहारदार अभिनयाने तब्बल पाच दशकांचा काळ रंगभूमीवर गाजवणाऱ्या ज्येष्ठ अभिनेत्री लालन सारंग (७९) यांचे शुक्रवारी पुण्यात निधन झाले. त्यांच्या पार्थिवावर शनिवारी दुपारी दादरच्या शिवाजी पार्क स्मशानभूमीत अंत्यसंस्कार करण्यात आले.

मराठी नाट्य आणि सिनेसृष्टीतील ज्येष्ठ अभिनेत्री लालन सारंग यांचे शुक्रवारी, ९ नोव्हेंबर रोजी पुण्यात दीर्घ आजाराने निधन झाले. त्यानंतर त्यांचे पार्थिव पुण्यातील बालगंधर्व येथे अंत्यदर्शनासाठी ठेवण्यात आले होते. तर, शनिवारी मराठी नाट्य परिषदेच्या माटुंगा येथील यशवंत नाट्य मंदिरच्या मध्यवर्ती कार्यालयात सकाळी ११.३० ते दुपारी १२.३० पर्यंत अंत्यदर्शनासाठी ठेवण्यात आले होते. लता नार्वेकर, विनय येडेकर, संजय नार्वेकर, तुषार दळवी, विनोद तावडे, निर्मिती सावंत, सुकन्या मोने, प्रतीक्षा लोणकर, प्रसाद कांबळी, अली असगर, अतुल परचुरे, अजित भुरे, सविता मालपेकर, विजय पाटकर, विजय कदम, राजन भिसे, अरुण काकडे, चिन्मयी सुमीत, विजय केंकरे, विवेक लागू, सुहिता थत्ते आदी कलाकारांनी लालन सारंग यांच्या पार्थिवाचे दर्शन घेतले. दुपारी शिवाजी पार्क स्मशानभूमीत त्यांच्या पार्थिवावर अंत्यसंस्कार करण्यात आले.