म. टा. विशेष प्रतिनिधी
राज्यातील सत्तेत एकत्र आलेल्या शिवसेना, काँग्रेस आणि राष्ट्रवादी काँग्रेस यांच्या महाविकास आघाडीतर्फे मुंबै जिल्हा सहकारी बँकेच्या निवडणुकीत महाविकास आघाडी म्हणून निवडणूक लढविण्याच्या दृष्टीने हालचाली सुरू झाल्या आहेत. या सहकारी बँकेवर सध्या भाजपची सत्ता असून त्यांना पराभूत करण्याचे डावपेच महाविकास आघाडीच्या नेत्यांकडून आखण्यास सुरुवात झाली आहे.
मनसेतून भाजपमध्ये प्रवेश केलेल्या प्रवीण दरेकर यांच्या नेतृत्वाखालील पॅनेलचा गेल्या निवडणुकीत विजय झाला होता. २१ संचालक निवडण्यासाठी झालेल्या गेल्या वेळेच्या निवडणुकीत शिवसेनेने स्वतंत्र पॅनेल उभे केले होते. तर दुसऱ्या बाजूला भाजपसोबत काँग्रेस आणि राष्ट्रवादी काँग्रेस यांचे पॅनेल होते. त्या निवडणुकीत शिवसेनेचे चार संचालक निवडून आले होते. तर बँकेची सत्ता भाजपकडे गेली होती.
आता राज्यातील राजकीय समीकरणे बदलल्याने जिल्हा परिषद व स्वानिक स्वराज्य संस्थांच्या निवडणुकीत महाविकास आघाडी झाली आहे. त्याच धर्तीवर मुंबै जिल्हा सहकारी बँकेच्या आगामी निवडणुकीत शिवसेनेसह काँग्रेस आणि राष्ट्रवादी काँग्रेसने महाविकास आघाडी म्हणून पॅनेल उभे करण्याच्या विचारात असून या तीन पक्षांच्या नेत्यांची बोलणी सुरू आहेत.
गेल्यावेळी एकाकी
मुंबै जिल्हा बँकेच्या गेल्या निवडणुकीत शिवसेनेचे आमदार सुनील राऊत यांनी पुढाकार घेऊन शिवसेनेचे पॅनेल उभे केले होते. आगामी निवडणुकीबाबत ते म्हणाले की, 'गेल्या निवडणुकीत शिवसेनेचे पॅनेल स्वतंत्र लढले होते. आम्हाला अन्य पक्षाची साथ मिळाली नव्हती. मात्र आता राज्यात शिवसेना, काँग्रेस आणि राष्ट्रवादी काँग्रेस या महाविकास आघाडीची सत्ता आहे. शिवसेनेसह महाविकास आघाडीतील काँग्रेस आणि राष्ट्रवादीच्या नेत्यांचीही महाविकास आघाडीचे पॅनेल उभे करून मुंबई जिल्हा बँकेची निवडणूक लढविली पाहिजे, असे मत आहे. त्यामुळे महाविकास आघाडी म्हणून ही निवडणूक लढण्याचा आमचे प्रयत्न आहे.'