पार्श्वगायिका मुबारक बेगम यांचं निधन

मटा ऑनलाइन वृत्त । मुंबई

प्रसिद्ध पार्श्वगायिका मुबारक बेगम यांचं रात्री साडेनऊ वाजता जोगेश्वरी येथील त्यांच्या राहत्या घरी निधन झालं. बऱ्याच कालावधीपासून त्या आजारी होत्या. त्या ८० वर्षांच्या होत्या. 'मुबारक बेगम यांची प्रकृती स्थिर नव्हती. त्या आजारी होत्या. रात्री साडेनऊ वाजता त्यांचं निधन झालं', अशी माहिती त्यांच्या कुटुंबियांनी दिली. आज त्यांच्या पार्थिवावर अंत्यविधी करण्यात येणार आहे.

मुबारक बेगम यांनी आपल्या आवाजाने १९५० ते १९७० असा दोन दशकांचा काळ गाजवला. बॉलिवूडमधील अनेक गाणी त्यांनी आपल्या आवाजाने अजरामर केली. 'हमारी याद आयेगी' या १९६१ मधील चित्रपटातील 'कभी तनहायी यों मे हमारी याद आयेगी' हे त्यांचं गाणं हिट ठरलं होतं.

१९५० ते १९६० या काळात त्यांनी बॉलिवूडमधील त्या वेळच्या सर्वोत्कृष्ट संगीत दिग्दर्शकांसोबत काम केलं. एस.डी. बर्मन, शंकर जयकिशन आणि खय्याम अशा दिग्गजासोबत त्यांनी काम केलं. सुनिल दत्त, नर्गिस आणि राजेंद्रकुमार अशा स्टार अभिनेत्यांच्या चित्रपटातील गाणी त्यांनी म्हटली. 'मुझ को अपने गले लगा लो ऐ मेरे हमराही', 'जब इश्क कहीं हो जाता है' आणि 'हम हाल ए दिल सुनाऐंगे', ही गाणी त्यांच्या हिट गाण्यांपैकी एक आहेत.

२०११ मध्ये त्यांची प्रकृती खालवली होती. राज्य सरकारने त्यांच्यावरील उपचारासाठी १ लाख रुपयांची मदत दिली होती. गेल्या महिन्यातही त्यांची प्रकृती बिघडली होती. यावेळी राज्य सरकारने बेगम यांच्यावरील उपचारासाठी ८० हजार रुपयांचा धनादेश त्यांच्या कुटुंबियांना दिला होता. उपचारानंतर त्यांना घरी आणण्यात आलं होतं.