भाऊ दाजी लाड लिफ्ट दुर्घटनेचं सीसीटीव्ही फुटेज जारी

मुंबई:

भायखळा येथील डॉ. भाऊ दाजी लाड वस्तुसंग्रहालयातील लिफ्ट दुर्घटनेचं सीसीटीव्ही फुटेज मुंबई मिररच्या हाती लागलं आहे. लिफ्ट कोसळण्यापूर्वी तब्बल दोन मिनिटे वरच्या मजल्यावरच अडकलेल्या अवस्थेत होती. त्यावेळी प्रशिक्षित लिफ्टमन लिफ्टमध्ये असता तर या दुर्घटनेत बळी गेलेल्या डॉ. अर्नवाझ हवेवाला वाचल्या असत्या, हे या फुटेजमुळे स्पष्ट होतं.

२८ एप्रिलला हा अपघात घडला. डॉ. हवेवाला आणि त्यांची कन्या या लिफ्टमध्ये शिरल्या आणि दोन मिनिटांतच लिफ्ट कोसळली. डॉ. हवेवाला यांचा उपचारादरम्यान मृत्यू झाला तर त्यांची मुलगी हेरा यांच्यावर उपचार सुरू आहेत.

एक्सपर्ट इक्विपमेंट प्रा. ली. या कंपनीने २००५ मध्ये ही लिफ्ट बसवली होती. यावर्षी मार्च महिन्यापर्यंत कंपनीने लिफ्टची देखभाल केली. मार्चमध्ये कंपनीचं कंत्राट संपलं होतं. कंपनीने संग्रहालयाला २०१४ मध्ये लिहिलेल्या पत्रात या लिफ्टला पूर्णवेळ एक प्रशिक्षित ऑपरेटर ठेवण्याची शिफारस केली होती. मात्र असं कोणतंही पत्र मिळालं नसल्याचं संग्रहालय प्रशासनाचं म्हणणं आहे.

मुंबई मिररला या अपघाताचं सीसीटीव्ही फुटेज प्राप्त झालं आहे. लिफ्ट कोसळण्यापूर्वी काही मिनिटं अडकली होती. डॉ. अर्नवाझ हवेवाला (६३) आणि त्यांची मुलगी हेरा (२८) या लिफ्टमधील बटण दाबून दरवाजा उघडण्याचा प्रयत्न करत असल्याचं या व्हिडिओत दिसतं. त्यानंतर संग्रहालयातील कर्मचारीही लिफ्टच्या दरवाजापाशी येऊन त्या दोघींना बाहेर काढण्याचा प्रयत्न करत असल्याचंही दिसतं. त्यानंतर काही क्षणात लिफ्ट कोसळ्याचंही या फुटेजमध्ये पाहायला मिळतं.


'लिफ्टचं दार अडकलं होतं, बाहेरच्या कर्मचाऱ्यांनाही काय करायचं ते माहित नव्हतं आणि आत त्या दोघींनाही बाहेर कसं पडायचं ते कळत नव्हतं,' असं या घटनेचा तपास करणाऱ्या पोलिसांनी सांगितलं. घरात किंवा बंगल्यांमध्ये दोन मजल्यांपर्यंत कार्यरत राहण्यासाठी ज्या प्रकारच्या हायड्रोलिक पद्धतीने चालणाऱ्या लिफ्ट बसवल्या जातात, त्या प्रकारची ही लिफ्ट होती. मात्र संग्रहालय हे सार्वजनिक ठिकाण असल्याने तेथे अशा प्रकारची लिफ्ट हाताळायला प्रशिक्षित कर्मचारीच हवा. अपघाताच्या दिवशी लिफ्ट ऑपरेटर असता तर त्याने इमर्जन्सी ब्रेकच्या सहाय्यानं लिफ्ट तळमजल्यापर्यंत आणली असती, असं एक्सपर्ट इक्विपमेंय कंपनीच्या अधिकाऱ्यांचं म्हणणं आहे.