DJ Ban: गणपती बाप्पाला डीजे-डॉल्बीची गरज नाही: CM

मुंबई :

गणपती बाप्पाला डीजे आणि डॉल्बीची आवश्यकता नाही, असे परखड मत मांडत राज्याचे मुख्यमंत्री देवेंद्र फडणवीस यांनी डीजे-डॉल्बी बंदीचे समर्थन केले आहे.

ध्वनीप्रदूषणाच्या मुद्द्यावरून मुंबई हायकोर्टाने डॉल्बीला परवानगी देण्यास नकार दिला आहे. या आदेशाला स्थगिती मिळावी म्हणून कोर्टात विनंती करण्यात आली होती ती विनंतीही फेटाळण्यात आली आहे. हे प्रकरण न्यायालयात प्रलंबित असताना पुणे, कोल्हापूर या शहरांतील अनेक सार्वजनिक गणेशोत्सव मंडळांनी या बंदीला उघड आव्हान देण्याचा प्रयत्न केला. या पार्श्वभूमीवर मुख्यमंत्र्यांनी ठाम भूमिका घेत डीजे-डॉल्बीला विरोध दर्शविला आहे.

वर्षा निवासस्थानी विराजमान झालेल्या बाप्पांचं विसर्जन करण्यात आल्यानंतर माध्यमांशी बोलताना मुख्यमंत्र्यांनी श्रीगणेशाला डीजे आणि डॉल्बीची गरज नसून त्याची आवश्यकता आपल्याला असते. आपण आपला उत्साह वाढवण्यासाठी ते वाजवतो, असे स्पष्ट शब्दांत सांगितले.

उत्सवातील उत्साह कमी व्हावा असे माझे मुळीच मत नाही मात्र उत्सव साजरा करत असताना निसर्ग आणि पारंपरिक पद्धती यांचाही विचार व्हावा. पारंपरिक वाद्ये अधिक उत्साह वाढवणारी आहेत. त्यांचा वापर व्हावा, असे मत मुख्यमंत्र्यांनी मांडले. डीजे आणि डॉल्बीमुळे ध्वनीप्रदूषण होतं, असेही ते म्हणाले.