गळफास घेऊन प्रेमी युगुलाची आत्महत्या

मटा ऑनलाइन वृत्त । मुंबई

मुंबईच्या कांदिवली येथील जंगलात प्रेमी युगुलानं गळफास घेऊन आत्महत्या केल्याची घटना शुक्रवारी मध्यरात्री उघडकीस आली. कृष्णा लक्ष्मण वरके व नीलम रामचंद्र भोईर अशी या दोघांची नावे आहेत. या प्रकरणी समता नगर पोलीस ठाण्यात आकस्मिक मृत्यूची नोंद करण्यात आली आहे.

कांदिवलीच्या आदिवासी जानुपाडा, या परिसरात हे दोघेही राहतात. या दोघांमध्ये मागील अनेक दिवसांपासून प्रेमसंबध होते. मात्र कृष्णा ३५ वर्षाचा असून तो विवाहित आहे. त्याला दोन मुलेही आहे. तर नीलम ही २१ वर्षाची असून ती आपल्या भावासोबत राहते. या दोघांमध्ये गेल्या अनेक महिन्यांपासून प्रेमसंबध होते. परंतु कृष्णा आधीच विवाहित असल्याने त्यांना विवाह बंधनात अडकता येत नव्हते. याच नैराश्यातून शुक्रवारी रात्री समतानगर येथील कालीमाता मंदिरापासून अंदाजे १०० मीटर आत जंगलामध्ये एका झाडास या दोघांनी गळफास घेऊन आत्महत्या केली. आपली बहीण बराच वेळ घरी न आल्यानं तिचा भाऊ मंगेश रामचंद्र भोईर यानं बरीच शोधाशोध केली. तिला शोधत असताना मध्यरात्री दोघांचे मृतदेह झाडास गळफास लावलेल्या अवस्थेत आढळले. यानंतर त्याने पोलीस नियंत्रण कक्षास माहीती दिली. त्यानुसार समता नगर पोलिसांनी आकस्मिक मृत्यूची नोंद केली असून पोलीस पुढील तपास सुरू आहे.