लोअर परळ रेल्वे पूल १० महिन्यांत

म. टा. खास प्रतिनिधी, मुंबई

पश्चिम रेल्वेने लोअर परळ पुलाचा धोकादायक भाग पाडण्याचे काम हाती घेतले असून हा भाग १० महिन्यांत उभारण्याच्या सूचना रेल्वे बोर्डाने दिल्या आहेत. १० महिन्यांत पुलाचा नवीन भाग बांधण्याचे आव्हान पश्चिम रेल्वेसमोर आहे. तांत्रिकदृष्ट्या अवघड असणारा हा पूल पाडण्यासाठी तीन महिन्यांचा कालावधी लागणार आहे. अशावेळी १० महिन्यांत हा पूल कसा बांधला जाणार याबाबत चर्चा सुरू आहे.

डिलाइल पूल हा सुरक्षिततेच्या दृष्टीने धोकादायक असल्याचे आयआयटीच्या अहवालात नमूद झाल्यानंतर हा पूल वाहतुकीसाठी बंद करण्यात आला. पश्चिम रेल्वेने त्यातील धोकादायक भाग पाडण्याचे काम नुकतेच सुरू केले आहे. त्यात हा संपूर्ण पूल पाडून नवीन पूल कोणी बांधायचा यातील रस्सीखेच गुरुवारी संपुष्टात आली. मुख्यमंत्री देवेंद्र फडवणीस, रेल्वेमंत्री पीयूष गोयल यांनी गुरुवारी घेतलेल्या बैठकीत हा तिढा अखेरीस सुटला. त्यात रेल्वे आणि पालिकेने आपापल्या हद्दीतील भाग बांधण्याचा निर्णय जाहीर करण्यात आला. हा पूल पाडण्यासाठी तीन महिन्यांचा कालावधी लागणार आहे. त्यामुळे उर्वरित सात महिन्यांत नव्याने पूल बांधण्याचे लक्ष्य साध्य करणे कठीण असल्याचे मत अधिकारी खासगीत व्यक्त करत आहेत.