मुंबई पालिकेत १० रुपयांच्या ‘थाळी’चा दोनदा शुभारंभ

म. टा. विशेष प्रतिनिधी, मुंबईः मुख्यमंत्री उद्धव ठाकरे यांच्या संकल्पनेतून सुरू करण्यात आलेली १० रुपयांत जेवणाची थाळी गुरुवारपासून महापालिका कॅण्टिनमध्ये सुरू करण्यात आल्याचे शिवसेनेने जाहीर केले. या थाळीचे गुरुवारी महापौर किशोरी पेडणेकर व स्थायी समिती अध्यक्ष यशवंत जाधव यांनी एकाच दिवशी परस्पर शुभारंभ केल्याने सेनेतील गटबाजी उघडकीस आली आहे. भाजपने या सर्व प्रकाराची जोरदार खिल्ली उडवली.

उद्धव यांच्या संकल्पनेतून १० रुपयांत जेवणाच्या थाळीचा शुभारंभ ठिकठिकाणी झाल्यानंतर गुरुवारी स्थायी समिती अध्यक्ष यशवंत जाधव, सभागृह नेत्या विशाखा राऊत, आरोग्य समिती अध्यक्ष अमेय घोले यांनी थाळी योजनेचा शुभारंभ केला. त्यानंतर अर्ध्या तासानंतर आरोग्य समिती अध्यक्ष अमेय घोले यांनी महापौर किशोरी पेडणेकर यांना आणून पुन्हा या थाळीचे उद्घाटन केले. यामुळे पालिकेत हा चर्चेचा विषय ठरला. विशेष म्हणजे पालिका मुख्यालयातील कॅण्टीनमध्ये चार वर्षांपासून १० रुपयांत जेवणाची थाळी मिळत आहे. त्यात दोन चपात्या, दोन भाज्या, डाळ, भात दिला जातो.

...म्हणूनच दोनदा उद्घाटन!

गरीबांना स्वस्त दारात अन्न मिळत असल्याने १० रुपयांच्या थाळीचे आपण त्याचे स्वागत करतो असे भाजपचे गटनेते मनोज कोटक यांनी नमूद केले. अशी थाळी पालिका कॅण्टीनमध्ये चार वर्षांपासून मिळत आहे, याची माहिती पालिकेतील सत्ताधाऱ्यांना नसावी. म्हणूनच त्यांनी दोनदा त्याचे उद्घाटन केले. ती थाळी खाणाऱ्यांमध्ये आता स्थायी समिती अध्यक्ष आणि शिवसेनेच्या नगरसेवकांचाही समावेश झाला, त्यांचे अभिनंदन असे म्हणत कोटक यांनी सेनेची खिल्ली उडवली.

आयुक्त गैरहजर

पालिकेतील सत्ताधाऱ्यांनी पालिका कर्मचारी आणि अधिकाऱ्यांना १० रुपयांत जेवणाची थाळी उपलब्ध करून देण्यासाठी स्थायी समिती अध्यक्ष, सभागृह नेत्या तसेच नंतर महापौर कॅण्टिनमध्ये आल्या. मात्र दोन्ही वेळी पालिका आयुक्त प्रवीण परदेशी आणि अतिरिक्त आयुक्त सुरेश काकानि हे हे अधिकारी उपस्थित राहिले नाहीत.