पोलिसांना सुविधा देण्यास वचनबद्ध; मुख्यमंत्री उद्धव ठाकरेंचे आश्वासन

म. टा. विशेष प्रतिनिधी, मुंबईः 'महाराष्ट्र पोलिसांचा आम्हाला अभिमान आहे. जगातील सर्वोत्तम पोलिस दल म्हणून महाराष्ट्र पोलिसांची ओळख निर्माण करण्यासाठी आवश्यक त्या सर्व सुविधा उपलब्ध करून देण्यासाठी राज्य शासन वचनबद्ध आहे', असे मुख्यमंत्री उद्धव ठाकरे यांनी बुधवारी सांगितले.

सह्याद्री अतिथीगृह येथे पोलिस अंमलदारांना पोलिस उपनिरीक्षक या अधिकारी पदावर पदोन्नतीची संधी उपलब्ध करून देण्याबाबत राज्य सरकारने घेतलेल्या निर्णयाच्या अनुषंगाने पोलिस कॉन्स्टेबल संवर्गातर्फे मुख्यमंत्री तसेच गृहमंत्री यांच्या आभार प्रदर्शन कार्यक्रमाचे आयोजन करण्यात आले होते. यावेळी मुख्यमंत्री बोलत होते. यावेळी गृहमंत्री दिलीप वळसे पाटील, मुख्य सचिव सीताराम कुंटे, अपर मुख्य सचिव मनुकुमार श्रीवास्तव, पोलिस महासंचालक संजय पांडे, मुंबईचे पोलिस आयुक्त हेमंत नगराळे आदी उपस्थित होते. यावेळी मुख्यमंत्री ठाकरे म्हणाले, 'पोलिस अंमलदारांसाठी हा आनंदाचा, तर राज्य सरकारसाठी समाधानाचा क्षण आहे. पोलिस हा राज्य शासनाचा कणा आहे. त्यांना पुरेशा सोयी-सवलती उपलब्ध करून देण्यासाठी शक्य ते सर्व करू. या निर्णयामुळे पोलिस अंमलदारांना अधिकारी पदापर्यंत काम करण्याची संधी मिळणार आहे. तसेच प्रलंबित प्रकरणांचा छडा लावणे, तसेच प्रकरणे निकाली काढण्यास गती मिळेल.' 'पोलिस अंमलदारांसाठी कॅशलेस उपचार तसेच खेळाडूंना पदोन्नती या मागण्यांबाबत शासन सकारात्मक असून, गृह विभागाने यासंदर्भात योग्य ती कार्यवाही करावी', असे निर्देशही त्यांनी दिले.

'पोलिस विभागाची ताकद वाढणार'

गृहमंत्री दिलीप वळसे पाटील म्हणाले, 'पोलिस अंमलदार सेवानिवृत्त होताना अधिकारी म्हणून निवृत्त व्हावा, ही दिवंगत गृहमंत्री आर. आर. पाटील यांची इच्छा होती. त्यासाठी त्यांनी प्रयत्नही केले. मी गृहमंत्री म्हणून सूत्रे स्वीकारल्यानंतर पोलिस महासंचालकांनी हा प्रस्ताव मांडला होता. त्याला आता संमती देण्यात आली आहे. सामान्यांना न्याय देण्याच्या शासनाच्या भूमिकेला चालना मिळणार असून, पोलिस विभागाची ताकद वाढून गुन्हे निकाली निघण्यास गती मिळणार आहे.'