maharashtra day: मोदींकडून मराठीत शुभेच्छा

मुंबई:

महाराष्ट्र दिनानिमित्त पंतप्रधान नरेंद्र मोदी यांनी महाराष्ट्रवासियांना मराठी भाषेत शुभेच्छा दिल्या. महाराष्ट्राची निरंतर प्रगती होवो आणि देशाच्या विकासाच्या प्रवासातील योगदानात वाढ व्हावी, असं त्यांनी ट्विटमध्ये म्हटलं आहे. राज्याचे मुख्यमंत्री देवेंद्र फडणवीस यांनीही महाराष्ट्र दिनाच्या शुभेच्छा दिल्या. महाराष्ट्र घडतोय...महाराष्ट्र बदलतोय...महाराष्ट्र दिनाच्या हार्दिक शुभेच्छा...! असं ट्विट त्यांनी केलं आहे.

राज्यात आज ठिकठिकाणी विविध कार्यक्रमांच्या माध्यमातून महाराष्ट्र दिन साजरा करण्यात येत आहे. पंतप्रधान नरेंद्र मोदींनीही सकाळी ट्विट करून महाराष्ट्र दिनानिमित्त शुभेच्छा दिल्या. ''महाराष्ट्रातील सर्व नागरिकांना महाराष्ट्र दिनाच्या शुभेच्छा! महाराष्ट्राच्या निरंतर प्रगती आणि समृद्धीसाठी मी प्रार्थना करतो. हे राज्य प्रगतीच्या नव्या उंचीवर पोहोचावे आणि देशाच्या विकासाच्या प्रवासात त्याचे योगदान असेच वाढत जावे,'' असं त्यांनी ट्विटमध्ये म्हटलं आहे.



तसंच भाजपाध्यक्ष अमित शहा यांनीही महाराष्ट्र दिनाच्या शुभेच्छा दिल्या आहेत. ''छत्रपती शिवाजी महाराज, डॉ. बाबासाहेब आंबेडकर, बाळ गंगाधर टिळक, स्वातंत्र्यवीर सावरकर आणि महात्मा फुलेंची पावन भूमी असलेल्या महाराष्ट्राच्या तमाम जनतेला महाराष्ट्र दिनाच्या शुभेच्छा. राज्याची निरंतर प्रगती आणि महाराष्ट्रवासीयांच्या सुख-समृद्धीसाठी प्रार्थना करतो, असं त्यांनी म्हटलं आहे.
मनसे अध्यक्ष राज ठाकरे यांनीही महाराष्ट्र दिनाच्या शुभेच्छा दिल्या. ''आज महाराष्ट्र दिन ! आज मराठी माणसाला त्याच्या हक्काचं राज्य मिळालं आणि एका अर्थानं मराठी भाषेला मान्यता मिळाली. हे राज्य मिळवण्यासाठी अनेका-अनेकांनी आपल्या प्राणांची आहुती दिली, अपार कष्ट झेलले. आज त्या सर्वांची आठवण करण्याचा आणि आपली जबाबादारी जाणण्याचा दिवस! जय महाराष्ट्र !,'' असं त्यांनी ट्विटमध्ये म्हटलं आहे.