कुत्रे भुंकतात, हत्ती डौलाने चालतोः मनसे

मुंबईः 'भुंकणारे कुत्रे बरेच असतात, हत्ती डौलाने चालत राहतो. मूर्ख माणसांच्या विधानाची दखल घेण्याची आम्हाला गरज वाटत नाही', अशा शब्दांत महाराष्ट्र नवनिर्माण सेनेनं एमआयएमचे आमदार वारीस पठाण यांचा समाचार घेतलाय. राज ठाकरे म्हणजे 'बुझा हुआ दियां' असल्याची बोचरी टिप्पणी पठाण यांनी केली होती. त्यावर, कोण विझतंय हे येत्या निवडणुकीत कळेलच, असा टोलाही मनसेनं हाणलाय.

मुंबईच्या स्टेशन परिसरातील अनधिकृत फेरीवाल्यांविरोधात मनसे आक्रमक झालीय, तर काँग्रेस फेरीवाल्यांच्या बाजूने उभी राहिलीय. या वादात रविवारी वारीस पठाण यांनी उडी घेतली. राज ठाकरे हे विझणारा दिवा आहेत. हिंमत असेल तर भायखळ्यात येऊन तोडफोड करून दाखवा, मग तुम्हाला दाखवतो, असं खुलं आव्हानच त्यांनी मनसैनिकांना दिलं होतं. मनसेचं आंदोलन म्हणजे राजकीय अस्तित्व जपण्यासाठीची धडपड असल्याची खिल्ली त्यांनी उडवली होती. त्याला मनसेनं जशास तसं प्रत्युत्तर दिलंय.

'हा मूर्ख वारीस पठाण मतविभागणीत निवडून आलाय, लॉटरी लागून आमदार झालाय. त्याचं योगदान काय आहे समाजासाठी? फक्त वादग्रस्त विधानं करून लक्ष वेधून घेण्याचं काम त्यानं केलंय. त्याच्या वक्तव्यांची दखल घ्यायचीही गरज नाही', अशी चपराक मनसे पदाधिकारी यशवंत किल्लेदार यांनी लगावली. भायखळा स्टेशन परिसर ८० टक्के फेरीवालामुक्त आहे. मग तिथे आम्ही कशाला जाऊ? मुळात, फेरीवाल्यांविरोधातली कारवाई पोलीस आणि महापालिका करतेय. वारीस पठाण उगाचच मनसेचं नाव घेऊन प्रसिद्धी मिळवतोय. राज ठाकरेंच्या सभेला लाखांची गर्दी होते ती बुझा हुआ दिया आहेत म्हणून का?, दीड वर्षानंतर याला कळेल कोण विझतंय ते, असंही किल्लेदार यांनी सुनावलं. 'कुत्ते भौकते है, हाथी चलता है', असा चिमटाही त्यांनी काढला आणि वारीस पठाण यांना ईदच्या शुभेच्छाही दिल्या.