'वंदे मातरम्'ची सक्ती; मनसेची 'सटकली'

मटा ऑनलाइन वृत्त । मुंबई

मुंबई महानगरपालिकांच्या शाळांमध्ये किमान दोन दिवस 'वंदे मातरम्' सक्तीचे करण्याच्या सत्ताधारी शिवसेना-भाजपच्या निर्णयावर महाराष्ट्र नवनिर्माण सेनेनं तीव्र प्रतिक्रिया नोंदवली आहे. आधी शाळेतील शिक्षण सुधारा मग ‘वंदे मातरम्’ची सक्ती करा, असा टोला मनसेने लगावला आहे.

'वंदे मातरम्'बद्दल गंभीर असणारे शाळेबद्दल, शिक्षणाच्या दर्जाबद्दल गंभीर नाहीत. विद्यार्थ्यांना दिलेले टॅब बंद आहेत. शाळेतील वस्तूंच्या खरेदीत दरवर्षी घोटाळा होतो, शाळांमध्ये पाणी गळतं, यावर सत्ताधारी ढिम्म आहेत. त्यांना काही करावंसं वाटत नाही. पण 'वंदे मातरम्' सक्तीचं केलं जातं, याला काय म्हणायचं?, असा सवाल मनसे नेते संदीप देशपांडे यांनी केला आहे. त्यामुळे पुन्हा सेना-मनसेत शाब्दिक चकमक उडण्याची शक्यता आहे.

'वंदे मातरम्'वरून विधानसभेत झालेल्या गदारोळानंतर हा वाद आता महापालिकेच्या पातळीवर पोहोचला आहे. भाजपने केलेल्या सूचनेवरून महापालिका शाळांमध्ये ‘वंदे मातरम्’ बंधनकारक करण्यात आले आहे. गुरुवारी तसा ठरावच सभागृहात मंजूर करण्यात आला. या ठरावावर आता पालिका आयुक्त निर्णय घेणार आहेत. समाजवादी पार्टीने या सक्तीला विरोध केला आहे. हा निर्णय धार्मिक भावना दुखावणारा असल्याने त्याबाबत कायदेशीर मत घेण्याची मागणी सपाने केली आहे. त्या पाठोपाठ मनसेनंही मूलभूत मुद्द्यांकडे लक्ष वेधत सत्ताधाऱ्यांना खडे बोल सुनावले आहेत.