राज्याप्रमाणे प्रवेश प्रक्रिया राबविण्याची केंद्राची सूचना
म. टा. विशेष प्रतिनिधी, मुंबई
आयटीआयचे प्रवेश सोपे व्हावे, या उद्देशाने राज्य कौशल्य विकास विभागाअंतर्गत येणाऱ्या आयटीआयने यंदा प्रवेशासाठी मोबाइल अॅप काढले आहे. देशातील असा हा पहिलाच प्रयोग असून त्याची दखल केंद्रीय कौशल्य विकास मंत्रालयाने घेतली आहे. तसेच इतर राज्यांनीही विद्यार्थ्यांना अशाप्रकारे सुविधा उपलब्ध करून देण्याबाबत सूचना केल्या आहेत. यामुळे राज्य आयटीआच्या शिरपेचात आणखी एक मानाचा तुरा खोवला गेला आहे.
राज्य व्यवसाय शिक्षण व प्रशिक्षण संचालनालयाने 'महा आयटीआय' या अँड्रॉइड अॅपची निर्मिती केली आहे. ज्या उमेदवारांनी आयटीआय प्रवेशासाठी अधिकृत वेबसाइटवर ऑनलाइन अर्ज दाखल केले आहेत, त्यांना हे 'महा आयटीआय' अॅप्लिकेशन वापरता येणार आहे. मागील दोन वर्षांत 'आयटीआय'कडून विद्यार्थ्यांना आकर्षित करण्यासाठी अनेक नव्या क्लृप्त्या वापरल्या जात आहेत. मॉडेल आयटीआय, खासगी कंपन्यांसोबत टाय-अप याचसोबत आता 'महा आयटीआय' ही संकल्पना त्यांनी प्रत्यक्षात आणली आहे. हे अॅप विद्यार्थ्यांना प्ले-स्टोअरवरून डाउनलोड करता येणार आहे. या अॅपच्या मदतीने विद्यार्थ्यांना त्यांचे अॅडमिशन स्टेटस, सबमिट ऑप्शन फॉर्म, राज्यातील आयटीआय संस्थांची माहिती, मेरिट नंबर, जागावाटप, निवडपत्र, प्रवेश निश्चिती पावती आदी गोष्टी घरबसल्या पाहता येणार आहेत. यामुळेच केंद्राकडून या अॅपचे विशेष कौतुक करण्यात आले आहे. अशी सुविधा इतर राज्यांनीही द्यावी, असे पत्र केंद्रीय कौशल्य विकास विभागाने सर्व राज्यांना पाठविले आहे. यापूर्वीही, आयटीआयचे प्रवेश ऑनलाइन करण्यामध्येही महाराष्ट्र राज्य आघाडीवर होते. तेव्हाही केंद्रीय मंत्रालयाने दखल घेऊन इतर राज्यांना सूचना केली होती.
..
सध्या विद्यार्थी मोबाइल सॅव्ही झाले आहेत. प्रत्येकाकडे कम्प्युटर नसेल, पण मोबाइल नक्कीच आहे. यामुळे विद्यार्थ्यांना प्रवेश प्रक्रिया सुलभ व्हावी, या दृष्टीने हे अॅप सुरू करण्यात आले आहे. या अॅपमुळे विद्यार्थ्यांना एकही प्रिंट आउट न काढता प्रवेश घेता येणार आहे. केंद्राने आपल्या राज्याचे हे दुसऱ्यांदा केलेले कौतुक आहे.
- योगेश पाटील, सहसंचालक, राज्य व्यवसाय शिक्षण व प्रशिक्षण संचालनालय
..
आयटीआयला विक्रमी अर्ज
आयटीआयच्या विविध योजना आणि रोजगाराची हमी यामुळे या अभ्यासक्रमाकडे विद्यार्थ्यांचा कल वाढू लागला आहे. यंदा आयआयटीआसाठी चार लाख ३७ हजार विद्यार्थ्यांनी नोंदणी केली असून त्यापैकी तीन लाख ७७ हजार ७१४ विद्यार्थ्यांनी अर्ज सादर केले आहेत. यामुळे यंदा आयटीआयच्या चांगल्या शाखांच्या प्रवेशासाठी चांगलीच चुरस रंगणार आहे.