महारेराचा म्हाडाला दणका

१० प्रकल्पांना मुदतवाढ नाही

घरांकडे डोळे लावून बसलेल्यांची निराशा?

म. टा. खास प्रतिनिधी, मुंबई

विकासकांच्या मनमानीवर निर्बंध आणणाऱ्या 'महारेरा'ने आता थेट म्हाडालाच नोटीस धाडली आहे. महारेराने (रिअल इस्टेट रेग्युलेशन अॅक्ट) म्हाडास पाठवलेल्या नोटिशीत प्रकल्पांची नोंदणी करून पुढील प्रकल्पांबाबत सातत्याने पाठपुरावा करूनही प्रतिसाद न दिल्याची गंभीर दखल घेतली आहे. महारेरास न मिळणाऱ्या प्रतिसादाची गंभीर दखल घेण्यात आली असून म्हाडाच्या १० प्रकल्पांना मुदतवाढ दिली जाणार नाही, अशी नोटीस बजावण्यात आली आहे.

म्हाडाने महारेराकडे नोंदणी केलेल्या ३४ पैकी १० गृहनिर्माण प्रकल्पांच्या मुदतवाढीची मागणी केली होती. त्यानंतर त्याविषयी महारेराकडून म्हाडातील संबंधित अधिकाऱ्यांबरोबर संपर्क साधण्यात आला. पण त्यासंदर्भात महारेराच्या अधिकाऱ्यांना म्हाडाच्या अधिकाऱ्यांकडून कोणताही प्रतिसाद न मिळाल्याची गंभीर बाब समोर आली आहे. त्यामुळे त्याची गंभीर दखल घेत महारेराने प्रकल्पांबाबत माहिती देण्यात यावी वा मुदतवाढीची मागणी मान्य केली जाणार नसल्याचे स्पष्ट करण्यात आले. महारेराकडून याविषयी नोटीस आल्यानंतर म्हाडाकडूनही लागलीच त्याची दखल घेण्यात आली आहे. यासंदर्भात तातडीने संबंधित अधिकाऱ्यांना महारेराशी संपर्क साधण्याच्या सूचना देण्यात आल्याचे समजते.

घरांची प्रतीक्षा कायम?

महारेराची नोटीस आल्याने म्हाडा वर्तुळात चर्चेने वेग घेतला आहे. नोटिशीची अमलबजावणी झाल्यास ३४ पैकी १० प्रकल्पांची पूर्तता, हस्तांतरण आदी प्रक्रिया पूर्णत: मागे राहण्याची भीती व्यक्त केली जात आहे. तशी वेळ प्रत्यक्षात आल्यास म्हाडा योजनेतील घरांकडे डोळे लावून बसलेल्या अनेकांची निराशा होण्याची भीती आहे. पण या स्थितीत महारेराकडून उपस्थित मुद्द्यांचे म्हाडाकडून योग्य पद्धतीने समाधान झाल्यानंतर तिढा सुटेल, असेही सांगण्यात येत आहे.