खादी-ग्रामोद्योगच्या कॅलेंडरवर गांधींऐवजी मोदी!

मटा ऑनलाइन वृत्त । मुंबई

खादी ग्रामोद्योगचं कॅलेंडर आणि डायरी याच्यावरून महात्मा गांधींचा फोटो हटवून त्याजागी पंतप्रधान नरेंद्र मोदी यांचा फोटा लावण्यात आल्याने कर्मचारी वर्गाने त्याबाबत तीव्र नाराजी व्यक्त केली आहे. याबाबत आपल्या भावना व्यक्त करण्यासाठी मुंबईत विलेपार्ले येथील खादी आणि ग्रामोद्योग आयोगाच्या मुख्य कार्यालयात आज दुपारी जेवणाच्या वेळेत अनेक कर्मचारी तोंडावर काळ्या पट्ट्या बांधून आत्मक्लेष करून घेणार आहेत.

गांधी आणि खादी असं अतुट नातं आहे. स्वदेशीची चळवळ उभारणाऱ्या महात्मा गांधींनी नेहमीच खादीचा आग्रह धरला. त्या विचारांतूनच खादी आणि ग्रामोद्योगाचा देशभर प्रसार झाला. असं असतानाच वर्षानुवर्षांची परंपरा मोडून खुद्द खादी आणि ग्रामोद्योग आयोगानेच महात्मा गांधी यांचा फोटो वार्षिक कॅलेंडर व डायरीतून वगळली आहे. त्याजागी पंतप्रधान नरेंद्र मोदी यांचा चरख्यावरील फोटो लावण्यात आला आहे. कॅलेंडरच्या बाराही पानांवर मोदी यांचाच फोटो आहे. यामुळे कर्मचारी वर्गाने उघड नाराजी व्यक्त केली आहे. गेल्या दोन वर्षांपासून हा प्रकार सुरू आहे. गेल्यावर्षी ही बाब कर्मचाऱ्यांनी चेअरमन विनयकुमार सक्सेना तसेच मुख्य कार्यकारी अधिकाऱ्यांच्या निदर्शनास आणून दिली होती. त्यावेळी पुढच्यावर्षी यात दुरुस्ती करण्यात येईल असे आश्वासन देण्यात आले होते पण तसं काहीही झालेलं नाही.



> २०१५चं खादी आणि ग्रामोद्योगचं कॅलेंडर

याबाबत काल खादी ग्रामोद्योगच्या मुख्य कार्यालयातील कर्मचाऱ्यांची एक तातडीची सभा घेण्यात आली. या सभेत गुरुवारी जेवणाच्या वेळेत दुपारी दीड ते दोन दरम्यान प्रार्थना कक्षात आत्मक्लेष करण्याचा निर्णय घेण्यात आला.

दरम्यान, पंतप्रधान मोदी यांच्या फोटोला आमचा आक्षेप नाही. आमचा आक्षेप महात्मा गांधी यांचा फोटो हटवण्यास आहे. गांधी आणि खादी हे अतुट नातं आहे आणि खादी व ग्रामोद्योगच्या कॅलेंडरवरून गांधीजींचा फोटो हटवणं हा त्यांचा अपमान आहे. म्हणूनच आम्ही आमच्या भावना प्रशासनापर्यंत पोहोचवत आहोत, असे कर्मचारी संघटनेच्या एका नेत्याने सांगितले.