बचत गटांना दुष्काळी झळा

sharmila.kalgutkar@timesgroup.com
@ksharmilaMT

मुंबई :
राज्यातील शेकडो महिलांना आर्थिक स्वावलंबन आणि आत्मभान देणाऱ्या बचतगटांना दुष्काळग्रस्त परिस्थितीचे चटके बसण्यास सुरुवात झाली आहे. कष्टकरी महिलांन पै-पैसा साठवून त्याच्या पाठबळातून स्वतःसह संसार सावरण्यास मदत करणाऱ्या या बचत गटांची साखळी विस्कळीत होऊ लागली आहे. वाढते स्थलांतर, रोजगाराला बसलेला फटका, भीषण पाणीटंचाई यावर मात करून बचत गटांचे काम सुरळीत कसे सुरू ठेवायचे हा प्रश्न उभा ठाकला आहे.

पाणीदुर्भिक्ष्यामुळे स्थलांतराचा वेग झपाट्याने वाढला आहे. रोजगाराची शाश्वती नसल्याने हातावर पोट असलेली दुष्काळग्रस्त भागातील असंख्य कुटुंबे गुजरात, मध्य प्रदेशकडे स्थलांतरित होत आहेत. त्याचा फटका गावागावांतील बचत गटांच्या शिस्तबद्ध कार्यपद्धतीला बसत आहे. 'लग्न, मुलांचे शिक्षण वा लघुउद्योग सुरू करण्यासाठी गटांमधून कर्ज उचलण्याकडे बचत गटातील महिला प्राधान्य देत होत्या. आता दुष्काळग्रस्त परिस्थितीमध्ये कुटुंब जगवण्यासाठी बचत गटात साठवलेले पैसे काढण्याचे प्रमाण वाढले आहे. त्याच वेगाने पैसे बचत करण्याचे प्रमाण घटले आहे', याकडे लोकसंघर्ष मोर्चाच्या समन्वयक प्रतिभा शिंदे लक्ष वेधतात.