..म्हणून परळ-एल्फिस्टन पुलावर झाली चेंगराचेंगरी

मटा ऑनलाइन वृत्त । मुंबई

परळ-एल्फिस्टन पुलावर झालेल्या दुर्घटनेमागची अनेक कारणे सांगितली जात आहेत. मात्र पुल कोसळल्याची अफवा पसरल्याने लोक बिथरले आणि जीव वाचविण्यासाठी एकमेकांच्या अंगावर कोसळल्याने चेंगराचेंगरी झाली. त्यामुळे २२ प्रवाशांना आपला जीव गमवावा लागल्याचं प्रत्यक्षदर्शींनी सांगितलं.

परळ-एल्फिस्टनचा हा पुल अत्यंत अरूंद असून सकाळी ऐन गर्दीच्या वेळी त्यातून प्रवास करणे धोकादायक असते. त्यामुळे सुद्धा मोठ्या प्रमाणावर चेंगराचेंगरी झाल्याचं प्रत्यक्षदर्शींनी सांगितलं. एक प्रत्यक्षदर्शी किशोर ठक्कर यांनी या घटनेची भयानकताच विशद केली. चेंगराचेंगरीनंतर जिन्यावर मृतदेह आणि जखमी प्रवासी पडले होते. आम्ही त्यांना उचलले आणि वाहनांपर्यंत नेले, असं किशोर म्हणाले. तर दुसऱ्या प्रवाशाच्या म्हणण्यानुसार, लोक पुलावरून जात होते. इतक्यात पाऊस सुरू झाल्यानं काही लोक थांबले. पण इतरांचं चालणं सुरूच होतं. त्यामुळे पुलावर गर्दी वाढल्यानं लोकांमध्ये धक्काबुक्की सुरू झाली आणि चेंगराचेंगरी झाली. काही क्षणात या ठिकाणी मृतदेहांचा खच पडला. जखमी विव्हळताना दिसले. लोकांनी मृतदेह उचलून केईएममध्ये नेल्यावर पोलीस आणि रेल्वे पोलीस घटनास्थळी दाखल झाले. दरम्यान, एकाच वेळी चार ट्रेन एकदम आल्याने प्रवाश्यांची गर्दी वाढून चेंगराचेंगरी झाल्याचं पश्चिम रेल्वेच्या एका अधिकाऱ्याचं म्हणणं आहे.

शॉर्ट सर्किटची अफवा

पाऊस सुरू होताच कुणी तरी पुलावर शॉर्ट सर्किट झाल्याची अफवा पसरवली. त्यामुळे लोकांमध्ये धावपळ माजली. अचानक लोक पळू लागले. तर काही लोक पुलावरच थांबले. त्याचवेळी कोणी तरी पुल तुटल्याची अफवा पसरवली. त्यामुळे लोक आणखीनच घाबरले आणि मोठी दुर्घटना घडली, असंही प्रत्यक्षदर्शींचं म्हणणं आहे.