मुंबईबाहेर जाणाऱ्या महामार्गावर वाहतूक कोंडी

मटा ऑनलाइन वृत्त । मुंबई

मुंबई-नाशिक, मुंबई-आग्रा, मुंबई-पुणे महामार्गांवर मोठ्या प्रमाणावर वाहतूक कोंडी निर्माण झाली आहे. त्यामुळे पावसाळी वातावरणात विकेंड साजरा करणाऱ्यांच्या आनंदाला काहीसा ब्रेक लागला आहे.

मुंबईबाहेर जाणाऱ्या या महामार्गांवर सुमारे १२ तासांपासून वाहतूक कोंडी निर्माण झाली आहे. मुंबई-नाशिक महामार्गावर मालवाहतूक करणाऱ्या अवजड वाहनात बिघाड झाल्याने वाहतूक कोंडी झाली आहे. मुंबई-पुणे एक्स्प्रेसवेवरील खोपोलीजवळ लूज बोल्डर्स काढण्याचे काम सुरू असल्याने १० ते १५ मिनिटांनी ब्लॉक घेण्यात येत आहे. त्यामुळे मुंबई-पुणे एक्स्प्रेसवेवरील वाहतुकीवर परिणाम झाला आहे.

ठाण्याहून बाहेर जाणाऱ्या मार्गावर मोठ्या प्रमाणावर वाहतूक कोंडी निर्माण झाली आहे. नादुरूस्त अवजड वाहनांमुळे मुंब्रा बायपास, खारेगाव टोलनाका, कापुरबावडी जंक्शन भागात वाहतूक कोंडी झाली आहे. मुंब्रा-शीळ फाटा रस्त्यावर खड्डे पडले आहेत. त्याशिवाय रेतीबंदर रस्त्यावर पाणी साचल्यामुळे मुंबई-पुणे जुन्या मार्गावर वाहतूक कोंडी झाली असून या मार्गावरील वाहतूक धीम्या गतीने सुरू आहे.
ठाण्याच्या दिशेने येणाऱ्या अवजड वाहनांच्या मोठ्या रांगा लागल्या आहेत. ठाण्यात येणाऱ्या अवजड वाहनांच्या रांगा पनवेलपर्यंत असल्याची माहिती मिळतेय. तर, जेएनपीटी बंदराच्या संगणक प्रणालीवर झालेल्या रॅन्सम वायरस हल्ल्यामुळे बंदरातील कामकाज बंद आहेत. त्यामुळे अनेक कंटेनर्स बाहेर अडकले आहेत. त्याच्या परिणामी वाहतूक कोंडी झाली आहे.