नाटक मोठे करा!

म. टा. खास प्रतिनिधी, सुधा करमरकर रंगमंच, मुलुंड

९८व्या अखिल भारतीय मराठी नाट्य संमेलनाचा उद्घाटन सोहळा खुसखुशीत संवादांनी रंगला खरा, पण संमेलनाचा पडदा उघडताच राष्ट्रवादी काँग्रेसचे अध्यक्ष शरद पवार व महाराष्ट्र नवनिर्माण सेनेचे अध्यक्ष राज ठाकरे यांनी नाट्यक्षेत्राचे कान टोचले. 'नाटक करून पोट भरण्यापेक्षा तारखा विकून पोट भरले जात आहे. मराठीत भव्य नाटक का दिसत नाही? नाटक मोठे करा,' अशा शब्दांत राज यांनी विनंतीवजा आदेश नाट्यकर्मींना दिला.

'नाटक ही मोठी जबाबदारी आहे. मराठी माणसाला नाटकाचे वेड आहे. नाटक खूप यावी, पण ती किती चालत आहेत,' असा सवाल करून राज यांनी, 'या क्षेत्रातील चुकीचे प्रकार नष्ट केले पाहिजेत,' असे ठणकावले. 'संहिता नाही, कारण चांगले लेखक कुठे गेले? तुमची जबाबदारी मोठी आहे. तुम्हाला नाटक मोठे करावे लागेल. भव्यता आणि संहिता एकत्र आल्या, तर मराठी माणूस पुन्हा नाटकाकडे वळेल. नाट्यगृहातील स्वच्छतागृहाच्या चर्चेपेक्षा गोष्ट चांगली असली पाहिजे. मराठी माणूस पैशाकडे बघत नाही. हिंदी सिनेमाला तो जातोच ना,' असा सवाल राज यांनी केला.

'आपली उंची तपासा'

त्यानंतर शरद पवार यांनीही नाट्यकर्मींना आपल्या शैलीत 'सल्ले' दिले. 'मराठी नाटकात कमतरता दिसत नाही. पण, सादरीकरण कसे करतो आणि जगातील बदलापाशी किती जातो, हा प्रश्न आहे. आपल्याला सुधारणा करण्याची गरज आहे. आर्थिक मदतीसाठी प्रत्येक वेळी सरकारवर अवलंबून राहण्याची गरज नाही. आपली उंची किती आहे, हे तपासले पाहिजे', असे चिमटे त्यांनी काढले. 'सतत नावीन्याचा ध्यास घेतला पाहिजे. बालरंगभूमी ही उद्याची प्रायोगिक आणि प्रायोगिक ही उद्याची व्यावसायिक रंगभूमी असल्याने पाया मजबूत केला पाहिजे,' याकडेही पवार यांनी लक्ष वेधले.