malad house collapse : मुंबईत पडझड; मालाडमध्ये घर कोसळून दोन ठार; १३ जखमी

मुंबई: मालाड मालवणी येथे नुरी मशीद जवळ तळमजला अधिक दुमजली घर कोसळल्याने झालेल्या दुर्घटनेत दोनजण ठार झाले आहेत. या दुर्घटनेत १३ जण जखमी झाले असून त्यांच्यावर उपचार करून सोडण्यात आले आहे.

आज दुपारी २ वाजून ३८ मिनिटांनी ही दुर्घटना घडली. मालाड मालवणी येथे नुरी मशीदजवळील गेट नंबर-५ जवळ तळमजला अधिक दुमजली घर कोसळले. त्यामुळे या परिसरात एकच घबराट पसरली. पाऊस सुरू असतानाच ही दुर्घटना घडली. त्यामुळे स्थानिकांना मदत कार्य करण्यात अडथळा येत होता. काहीवेळाने अग्निशमन दल आणि पोलिसांनी घटनास्थळी धाव घेऊन मदतकार्यात सुरुवात केली. पोलीस आणि अग्निशमन दलाने ढिगारा उपसण्याचं काम युद्धपातळीवर हाती घेऊन ढिगाऱ्याखालून १५ जणांना बाहेर काढलं.

या १५ जणांना तातडीने मालाड येथील हयात रुग्णालयात उपचारासाठी दाखल करण्यात आले. मात्र रुग्णालयात पोहोचण्यापूर्वीच फैजल वाहिद सय्यद या व्यक्तीचा आणि अंजूम शहाबुद्दीन शेख या महिलेचा मृत्यू झाला. तर इतर १३ जणांना किरकोळ मार लागल्याने त्यांच्यावर उपचार करून त्यांना डिस्चार्ज देण्यात आला. अग्निशमन दलाच्या जवानांनी फायर इंजिन, रेस्क्यू व्हॅन आणि जेसीबी मशीनच्या सहाय्याने हा संपूर्ण ढिगारा उपसला आहे. या दुर्घटनेत आजूबाजूंच्या घरांनाही तडा गेल्याचं सांगण्यात येतं.


सीएसएमटीजवळ इमारतीचा भाग कोसळला; अनेकजण दबल्याची भीती

फोर्टमध्ये इमारत कोसळली

मालाडमधील घर कोसळून दोनजण ठार झाल्याची घटना ताजी असतानाच सायंकाळी फोर्ट येथे इमारतीचा भाग कोसळल्याची घटना घडली. आज सायंकाळी ४ वाजून ४३ मिनिटांनी फोर्ट येथील जीपीओ समोरील कबुतरखान्याजवळ असलेली भानुशाली इमारतीचा काही भाग कोसळला. ही तळमजला अधिक पाच मजली रहिवाशी इमारत आहे. इमारतीचा भाग कोसळताच जोरदार आवाज झाला. त्यामुळे परिसरातील लोक घाबरले आणि आवाजाच्या दिशेने पळत सुटले. इमारतीचा काही भाग कोसळल्याचं पाहून स्थानिकांनी तात्काळ अग्निशमन दल आणि पोलिसांना फोन करून घटनास्थळी पाचारण केलं. पोलीस आणि अग्निशमन दलाच्या जवानांनीही तात्काळ घटनास्थळी येऊन ढिगारा उपसण्यास सुरुवात केली. स्थानिकांनीही ढिगारा उपसण्याच्या कामात अग्निशमन दलाला मदत करण्यास सुरुवात केली आहे. सध्या या ठिकाणी अग्निशमन दलाचे ८ फायर इंजिन, २ रेस्क्यू व्हॅन आणि १० डंपर्स कार्यरत आहेत. महापालिकेच्या ५० मजूरांच्या सहाय्याने हा ढिगारा उपसण्यात येत असून ढिगाऱ्याखालून आतापर्यंत दोघाजणांना बाहेर काढण्यात आलं आहे. दरम्यान, मुंबईत पावसाची रिपरिप सुरू असल्याने या कामात अडथळा निर्माण होत आहे.


BMC : नाल्यात कुणीही पडल्यास आम्ही जबाबदार नाही; महापालिकेचे मुंबईत बॅनर्स

किट आले; आता करा फक्त ३९९ रुपयांत करोना चाचणी, तीही दीड तासात