साध्वीच्या जामिनास विरोध नाही

मुंबईः मालेगावमधील २९ सप्टेंबर २००८च्या बॉम्बस्फोट प्रकरणातील आरोपी साध्वी प्रज्ञा सिंहच्या जामीन अर्जाला सोमवारी राष्ट्रीय तपास यंत्रणेने (एनआयए) विशेष एनआयए न्यायालयासमोर म्हणणे मांडताना विरोध केला नाही. ‘आम्ही साध्वीच्या जामीन अर्जाला विरोध केला नाही. आम्ही आरोपपत्र दाखल केलेले असल्याने न्यायालयाने स्वतःच या अर्जाविषयी योग्य तो निर्णय घ्यावा, असे आम्ही न्यायालयाला सांगितले,’ असे एनआयएच्या एका अधिकाऱ्याने पत्रकारांना सांगितले.

दरम्यान, २००६साली मालेगावमध्ये झालेल्या बॉम्बस्फोटांच्या दुसऱ्या घटनेतील चार आरोपींचे जामीन अर्ज विशेष एनआयए न्यायालयाने सोमवारी फेटाळून लावले. न्यायालयाने एप्रिलमध्ये आठ आरोपींना आरोपमुक्त केले होते. त्या पार्श्वभूमीवर, मनोर सिंग, राजेंद्र चौधरी, धन सिंग व लोकेश शर्मा यांनी आम्हाला या प्रकरणात गोवले असल्याचा दावा करत जामिनासाठी अर्ज केले होते. मात्र, या आरोपींविरोधात गंभीर आरोप असून त्यांच्याविरुद्ध सबळ पुरावेही आहेत, असे म्हणणे एनआयएने मांडले. त्यामुळे न्या. व्ही. व्ही. पाटील यांनी त्यांचे अर्ज फेटाळून लावले.