सुट्टीदिवशी मुलाला भीक मागण्याची ड्युटी!

मुंबई: शाळेच्या सुट्टीच्या दिवशी मुलाला भीक मागायला भाग पाडणाऱ्या पित्याला बोरिवलीच्या एम.एच.बी. कॉलनी पोलिसांनी अटक केली. रमेश काळे असे या पित्याचे नाव असून, गजरे विकून कुटुंबाचा खर्च चालवत असल्याचे त्याने चौकशीत पोलिसांना सांगितले.

एम.एच.बी. कॉलनी पोलिसांचे पथक रविवारी नेहमीप्रमाणे वाहनातून गस्त घालत होते. बोरिवली पश्चिमेकडील देविदास रोडवरील सुधीर फडके पुलाजवळील सिग्नलवर एक आठ वर्षाचा मुलगा वाहनचालकांकडे भीक मागत असल्याचे पोलिसांना दिसले. पोलिसांनी या मुलाला बोलवून चौकशी केली असता गणपत पाटीलनगरमध्ये राहत असल्याचे मुलाने सांगितले. शाळेत सुट्टी असेल त्या दिवशी वडील भीक मागण्यास लावत असल्याचे त्याने सांगितले. त्यानुसार पोलिसांनी मुलाचा पिता रमेश काळे याला शोधून काढले. काळे याने मुलाला सिग्नलवर भीक मागण्यास लावत असल्याचे मान्य केले. त्यानुसार पोलिसांनी बाल न्याय काळजी आणि हक्क संरक्षण कायद्यानुसार काळे याच्यावर कारवाई केली.