'त्या' पित्यास पुन्हा आसरा

वृत्तसंस्था, मुंबई

रक्ताचे पाणी करून मुलांना वाढवणाऱ्या पालकांची वृद्धापकाळी मुलांनीच घरातून हकालपट्टी करण्याच्या कैक घटना पाहायला मिळतात. अशाच एका घटनेत, समाजाकडून निर्भर्त्सना झाल्यानंतर खजिल झालेल्या मुलास वडिलांसाठी योग्य व्यवस्था करण्याची तयारी दर्शवली आहे. वयोवृद्ध पित्याची घराबाहेर रवानगी केलेल्या या मुलाने आठ वर्षानंतर वडिलांची पुन्हा मानाने घरात राहण्याची व्यवस्था करण्याचे आश्वासन देत प्रायश्चित्त स्वीकारल्याचा प्रसंग अंधेरी पश्चिमेतील वर्सोवामध्ये घडला आहे.

शंकर वाघमारे (७२) हे चित्रकार असून त्यांनी जे. जे. स्कूल ऑफ आर्ट्समधून डिप्लोमा केला आहे. मुलाने घराबाहेर काढल्यावर त्यांनी निवाऱ्यासाठी रेल्वे स्थानक, उद्याने, वर्सोव्यातील मंदिर यांचा आसरा घेतला. काही दिवसांपासून ते भाजप आमदार भारती लव्हेकर यांच्या कार्यालयात वास्तव्य होते.

दरम्यान, अंधेरी पश्चिमेतील वर्सोवा येथे स्थानिक रहिवाशांच्या गटाने आमदार लव्हेकर यांच्या सहाय्याने वाघमारे राहत असलेल्या लोखंडवाला सर्कल परिसरात एक मोठा फलक लावला होता. त्यात शंकर वाघमारे आणि त्यांचा मुलगा विकास यांचा फोटो लावून विकासने वडिलांना आदराने पुन्हा घरी घेऊन जावे, असे आवाहन केले होते. या प्रकरणाची दखल घेत वर्सोवा पोलिसांनी विकास याला काही दिवसांपूर्वी पोलिस स्थानकात बोलावून घेतले. शेवटी विकासने वडिलांना राहण्याची व्यवस्था पुरवण्याची तयारी दर्शवली. पित्यास घराबाहेर काढल्याने सामाजिक स्तरावर बरीच निर्भर्त्सना झाल्याने विकास वाघमारे (४५) याने वडील शंकर वाघमारे यांची माफी मागून त्यांची काळजी घेण्याचे आश्वासन दिले.