प्रवाशाचे प्राण वाचवले

म. टा. खास प्रतिनिधी, मुंबई

मध्य रेल्वेवर दादर स्थानकात रेल्वे सुरक्षा बलाच्या (आरपीएफ) अधिकारी, जवानाने मंगळवारी चालत्या एक्स्प्रेसमधून प्लॅटफॉर्मवर उडी मारताना स्वत:चा जीव धोक्यात घालणाऱ्या प्रवाशाचे प्राण वाचवले. मध्य रेल्वेवर दुपारच्या सुमारास प्लॅटफॉर्म क्रमांक सहावरील सीसीटीव्हीमध्ये उपनिरीक्षक विनीत सिंह आणि जवान दिवाण सिंह यांनी या प्रवाशाचे प्राण वाचवल्याचा हा सर्व प्रसंग चित्रित झाला आहे.

मध्य रेल्वेवर प्लॅटफॉर्म क्रमांक सहा येथे दुपारी १.०५ च्या सुमारास हैदराबाद एक्स्प्रेस दादर स्थानकात येत असतानाच हा प्रसंग ओढवला. प्लॅटफॉर्म क्रमांक सहावर ही एक्स्प्रेस येत असतानाच गौतम ताती हा युवक सामानासह उतरण्याच्या तयारीत होता. गाडीच्या वेगाचा अंदाज न आल्याने त्याने सामानासह प्लॅटफॉर्मवर उडी मारली. पण तोल सुटल्याने गौतम हा प्लॅटफॉर्मवर धडपडला आणि तो गाडीखाली जातो की काय असे दृश्य होते. सुदैवाने आरपीएफच्या दुकलीने प्रसंगावधान राखून त्यास एका बाजूला खेचून घेतले.

ड्युटीवर तैनात असलेल्या या दोघांनी प्लॅटफॉर्मवर धडपडत असलेल्या गौतमला पाहून तिथे धाव घेतली. काही सेकंदातच घडलेले हे नाट्य प्रवाशांनाही अचंबित करणारे होते. यापूर्वीही दिवाण सिंह यांनी २४ जुलै रोजी दादर स्थानकात एका ज्येष्ठ नागरिकाचे प्राण वाचवले होते.