सासरच्यांच्या त्रासाला कंटाळून पतीची आत्महत्या

मुंबईः सासरच्या मंडळीच्या त्रासाला कंटाळून कुरार येथील नागसेन वाघमारे (२७) या व्यक्तीने शनिवारी आत्महत्या केली. नागसेन हा एका खासगी कंपनीत कामाला होता. त्याची पत्नी शिक्षिका आहे. दोघेही कामाला जात असल्यामुळे मुलाला सासरच्या मंडळींकडे ठेवले जात होते. त्यावरून नागसेन आणि सासरच्या मंडळींमध्ये खटके उडत होते.

वेळोवेळी सासरची मंडळी आणि पत्नी मुलाच्या मुद्द्यावरून नागसेनला त्रास देत होती. याच त्रासाला कंटाळून नागसेनने शनिवारी राहत्या घरी गळफास लावून घेत आत्महत्या केली. या प्रकरणी कुरार पोलिसांनी सासू ,सासरे, मेव्हणा आणि पत्नीविरोधात गुन्हा नोंदवला आहे.