दैव बलवत्तर होतं म्हणून...

मटा ऑनलाइन वृत्त । मुंबई

'काळ आला होता, पण वेळ आली नव्हती' अशी मराठीत म्हण आहे. त्याचा प्रत्यय एका रेल्वे प्रवाशाला आला. रेल्वे रुळ ओलांडण्याच्या प्रयत्नात असलेला हा प्रवासी लोकलखाली आला आणि चिरडला जाणार अशी भीती वाटत असतानाही तो सुखरूप बचावला. मंगळवारी सकाळी दहा वाजण्याच्या सुमारास मशीद स्थानकात हा थरारक अपघात झाला.

रे रोड येथे राहणाऱ्या २४ वर्षांच्या मोहम्मद शेख या युवकानं तिकीट तपासनीसाकडून वाचण्यासाठी छत्रपती शिवाजी महाराज टर्मीनसकडं जाणाऱ्या लोकलमधून उडी मारली. रूळ ओलांडून दुसऱ्या प्लॅटफॉर्मवर जात असताना कल्याणच्या दिशेने येणाऱ्या लोकलकडे त्याचे लक्ष नव्हते. प्लॅटफॉर्मवर चढत असताना त्याला लोकलची धडक बसली. तो लोकलखाली चिरडला जाणार असंच सर्वांना वाटलं. मात्र, तेवढ्यात मोटरमननं वेग कमी करत लोकल थांबवली. आरपीएफच्या जवानांनी त्याला बाहेर काढलं. त्यानंतर मोहम्मदला सेंट जॉर्ज रुग्णालयात दाखल करण्यात आलं. या अपघातात त्याच्या दोन्ही हाताला फ्रॅक्चर झालं आहे.

योग्य तिकिटासह प्रवास करा, रूळ ओलांडू नका आदी आवाहन रेल्वेकडून केले जातात. मात्र, प्रवाशी या सूचनांकडे दुर्लक्ष करतात आणि अशा जीवघेण्या प्रकाराला सामोरं जातात, अशी खंत एका अधिकाऱ्यानं व्यक्त केली.