कन्हैया कुमारचा विमानात दाबला गळा

मटा ऑनलाइन वृत्त । मुंबई

पुण्याला जाताना मुंबई विमानतळावर जेट एअरवेजच्या विमानात एका अज्ञात व्यक्तीने गळा दाबला, असा आरोप जेएनयूचा विद्यार्थी नेता कन्हैया कुमारने केला आहे. मात्र, सहप्रवाशाचा केवळ धक्का लागला आणि त्यावरून दोघांमध्ये बाचाबाची झाली, अशी माहिती समोर आली आहे. इतर प्रवाशांच्या सुरक्षेच्या कारणास्तव दोघांनाही खाली उतरवण्यात आले आहे, अशी माहिती 'जेट एअरवेज'ने दिली आहे.

कन्हैया कुमार जेट एअरवेजच्या विमानाने आज सकाळी पुण्याला निघाला होता. त्याचवेळी विमानातील अज्ञान व्यक्तीने आपल्यावर हल्ल्याचा प्रयत्न केला, तसंच आपला गळा दाबला, अशी माहिती कन्हैयाने ट्विटद्वारे दिली. याप्रकरणी कन्हैयानं सुरक्षा अधिकाऱ्यांकडे तक्रार केली. त्यानंतर सुरक्षा अधिकाऱ्यांनी अज्ञात व्यक्तीला ताब्यात घेऊन चौकशी केली. मानस ज्योती डेक्का असं या व्यक्तीचं नाव असल्याचं चौकशीत समोर आलं. मी कुणावरही हल्ला केला नाही. मी याला ओळखतही नाही, असं डेक्का यानं सांगितलं.

कोलकाताचा रहिवासी असलेला डेक्का हा जेट एअरवेजच्या विमानात चढला. त्याची विंडो सीट आरक्षित होती. जागेवर बसण्यासाठी जात असताना त्याचा बाजुलाच बसलेल्या कन्हैयाला धक्का लागला. त्यातून दोघांमध्ये बाचाबाची झाली. याच रागातून त्याने कन्हैयाची कॉलर पकडली. यानंतर कन्हैयानं सुरक्षा अधिकाऱ्यांकडं तक्रार केली, अशी माहिती सूत्रांनी दिली. इतर प्रवाशांच्या सुरक्षेच्या कारणास्तव सुरक्षा अधिकाऱ्यांनी दोघांना विमानातून उतरवलं, अशी माहिती जेट एअरवेजनं दिली. दरम्यान, मानस डेक्का हा भाजपचा कट्टर समर्थक असल्याचा दावा कन्हैयानं केला आहे.