गुन्ह्यात मानेचा सहभाग दिसतो; अँटिलिया प्रकरणाच्या आदेशात न्यायालयाचे निरीक्षण

मुंबई : ‘अँटिलिया विस्फोटके दहशत व मनसुख हिरन यांची हत्या या गुन्ह्यांच्या प्रकरणात एनआयएने जमवलेले पुरावे व साक्षीदारांचे जबाब पाहता आरोपी सुनील मानेचा गुन्ह्यांत सहभाग असल्याचे प्रथमदर्शनी स्पष्टपणे दिसते’, असे निरीक्षण विशेष एनआयए न्यायालयाचे न्यायाधीश ए. एम. पाटील यांनी मानेचा आरोपमुक्तीचा अर्ज फेटाळणाऱ्या आदेशात नोंदवले आहे.

‘हा कट सचिन वाझे व प्रदीप शर्मा यांनी अन्य सहआरोपींच्या मदतीने रचला होता. उद्योगपती मुकेश अंबानी यांच्या अँटिलिया निवासस्थानाजवळ विस्फोटके भरलेले वाहन उभे करणे किंवा त्या वाहनाचे मालक मनसुख हिरन यांचे वाहन चोरणे याच्याशी माझा काहीच संबंध नाही. आरोपपत्रातूनही हे स्पष्ट होते. त्यामुळे दहशतवादी कृत्यांविरोधातील बेकायदा कारवाया प्रतिबंधक कायदा (यूएपीए) आणि भारतीय दंड विधानातील दहशतवादविरोधी तरतुदींखालील नोंदवलेल्या आलेल्या गुन्ह्यातून आरोपमुक्त होण्यासाठी मी पात्र आहे’, असा दावा मानेने त्याच्या अर्जात केला होता. मात्र, ‘साक्षीपुरावे लक्षात घेता मानेचा गुन्ह्यातील सहभाग दिसून येतो. वाझेने मानेसह अन्य सहआरोपींच्या मदतीने हिरन यांच्या हत्येचा कट रचल्याचे दाखवणारे पुरावे सरकारी पक्षाकडे आहेत. मानेच्या मोबाईलचे कॉल डिटेल्स रेकॉर्ड व साक्षीदारांचे जबाबही आहेत. हिरनचे वाहन चोरून ते २५ फेब्रुवारी २०२१ रोजी अँटिलियाजवळ विस्फोटकांसह उभे करणे आणि त्यानंतर हिरनची हत्या करणे हा दहशत पसरवण्याचा सुनियोजित कट होता आणि हे दहशतवादी कृत्य होते, असे एनआयएच्या आरोपपत्रातून दिसते. या टप्प्यावर मानेची भूमिका एकूण कटातून वेगळी केली जाऊ शकत नाही. २५ फेब्रुवारी २०२१च्या घटनेबाबत अन्य आरोपींच्या कृत्याची मानेला कल्पना नव्हती, असा निष्कर्ष पुरावे तपासले न जाता काढला जाऊ शकत नाही’, असे न्यायाधीशांनी आपल्या निर्णयात स्पष्ट केले.

एनआयएने या प्रकरणात वाझे, शर्मा व माने यांच्यासह १० आरोपींना अटक केली. अँटिलिया घटनेनंतर काही दिवसांनी ठाणे परिसरात हिरन यांचा मृतदेह आढळून आला होता. ‘विस्फोटके भरलेले वाहन अंबांनींच्या निवासस्थानाजवळ उभे करून त्याची जबाबदारी घेण्यासाठी वाझेने हिरनला प्रवृत्त करण्याचा प्रयत्न केला होता. मात्र, हिरनने त्यास नकार दिला. त्यामुळे प्रदीप शर्मा व सुनील माने यांच्या मदतीने मारेकरी मिळवून हिरनला संपवण्याचा कट वाझेने रचला. मानेने या सुनियोजित कटात भाग घेतला. हे कृत्य थेट दहशतवादी कृत्यात मोडते’, असे आपल्या प्रतिज्ञापत्रात नमूद करत एनआयएने मानेच्या अर्जाला तीव्र विरोध दर्शवला होता.