म. टा. खास प्रतिनिधी, मुंबई
रेल्वे स्थानकातील तिकीट खिडक्यांकडे जमा झालेली रक्कम सुरक्षित ठिकाणी नेली जात असतानाच त्यातील १६ लाख रुपये लुटण्याचा प्रकार बुधवारी मानखुर्द रेल्वे स्थानकाबाहेर घडला. तिकीट खिडक्यांकडील दररोजचा गल्ला जमा करण्याचे कंत्राट खासगी कंपनीस देण्यात आले आहे. बुधवारी दुपारी कंपनीच्या गाडीतून ५० ते ६० लाखांची रोकड नेली जात असतानाच मानखुर्द येथे ही लूट झाली.
हार्बर मार्गावरील वेगवेगळ्या स्थानकातील तिकीट खिडक्यांवर जमा होणारी रक्कम गोळा करण्याचे काम खासगी कंपनीस कंत्राटी स्तरावर दिले आहे. त्याप्रमाणे ही रक्कम जमा करून कंपनीचे कर्मचारी गोरेगाव येथे जात होते. मात्र त्यांच्या मागावर असलेल्या लुटारूंनी मानखुर्द येथील धोबीघाट येथे ही गाडी थांबवली. एका गाडीतून आलेल्या चौघांनी कंपनीच्या गाडीतील कर्मचाऱ्यांना मारहाण करून त्यातील साडेसोळा लाख रुपये घेऊन पोबारा केला. मानखुर्द पोलिस ठाण्यात गुन्हा दाखल करण्यात आला आहे.