म. टा. खास प्रतिनिधी, मुंबई
अखिल भारतीय साहित्य संमेलनाच्या निमित्ताने राजहंस, ज्योत्स्ना, कॉन्टिनेंटल, मौज, पॉप्युलर आणि रोहन या सहा प्रकाशकांनी तयार केलेल्या मराठीरीडर अॅपला तरुण वाचकांकडून चांगला प्रतिसाद मिळत आहे. महिनाभराच्या कालावधीमध्ये १५००हून अधिक वाचकांनी हे अॅप डाऊनलोड केले असून अॅप डाऊनलोडच्या दहा टक्के पुस्तके डाऊनलोड करण्यात आली आहेत. अजूनही अपेक्षित प्रमाणात या अॅपवर पुस्तके उपलब्ध नाहीत, मात्र मराठीरीडर अॅप महिन्या-दोन महिन्यांच्या कालावधीमध्ये आणखी नवी पुस्तके वाचकांसमोर सादर करणार आहे.
साहित्य संमेलनानंतर काही नवी पुस्तके या अॅपवर उपलब्ध झाली आहेत. दर आठवड्याला नवीन प्रकारातील पुस्तक यामध्ये समाविष्ट करण्याचा प्रयत्न आहे. यामध्ये चरित्र, कादंबऱ्या, कथा, कविता, वैचारिक, बालसाहित्य अशा वैविध्यपूर्ण पुस्तकांचा समावेश आहे. मौजेची पुस्तकेही आतापर्यंत या अॅपवर उपलब्ध नव्हती. मात्र महिन्याभराच्या कालावधीत मौजेचीही विविध पुस्तके या व्यासपीठाच्या माध्यमातून वाचकांपर्यंत पोहोचतील. हे अॅप लोकांपर्यंत खऱ्या अर्थाने पोहोचायला अजून काही काळ जावा लागेल. मात्र याला सकारात्मक भविष्यकाळ आहे, अशी भावना रोहन प्रकाशनचे रोहन चंपानेरकर यांनी व्यक्त केली.
येत्या दोन महिन्यांच्या काळात आणखी १०० पुस्तके लवकरच अॅपवर अपलोड करण्यात येणार आहेत. या सहा प्रकाशकांव्यतिरिक्त इतर अनेक प्रकाशकांची पुस्तकेही या अॅपच्या माध्यमातून उपलब्ध करून देण्यात येणार आहेत. त्यांच्याशी हे व्यासपीठ संपर्कात आहे, अशी माहिती ज्योत्स्ना प्रकाशनचे मिलिंद परांजपे यांनी दिली. लोकांना अधिक प्रमाणात पुस्तके हवी आहेत. याबद्दल सातत्याने वाचकांशी संपर्क साधण्यात येत आहे. यामुळे छापील पुस्तकांपलीकडे जाऊन काही पुस्तके ई-बुक्स स्वरूपातच आणण्याबद्दलही विचार करता येईल, अशीही चर्चा या निमित्ताने सुरू झाली आहे.
दरम्यान, साहित्य संमेलनादरम्यान मराठीरीडर अॅपच्या स्टॉलवर आलेल्या सॉफ्टवेअर क्षेत्रातील काही वाचकांनी आम्ही काही मदत करू शकतो का, अशी विचारणाही केली. त्यामुळे प्रकाशकांना अधिक बळकटी मिळाल्याचे सांगण्यात येत आहे. हे अॅप डाऊनलोड करणाऱ्यांचा वयोगट महाविद्यालयीन तरुणांपासून पन्नाशीपर्यंत सर्वांचा आहे. परदेशातूनही अॅप डाऊनलोड करण्यात आले आहे. अॅपवर जशी पुस्तकांची संख्या वाढत जाईल, त्यासंदर्भातील माहिती ई-मेलच्या माध्यमातून वाचकांपर्यंत पोहोचवण्यात येणार आहे.
अखिल भारतीय साहित्य संमेलनाच्या निमित्ताने राजहंस, ज्योत्स्ना, कॉन्टिनेंटल, मौज, पॉप्युलर आणि रोहन या सहा प्रकाशकांनी तयार केलेल्या मराठीरीडर अॅपला तरुण वाचकांकडून चांगला प्रतिसाद मिळत आहे. महिनाभराच्या कालावधीमध्ये १५००हून अधिक वाचकांनी हे अॅप डाऊनलोड केले असून अॅप डाऊनलोडच्या दहा टक्के पुस्तके डाऊनलोड करण्यात आली आहेत. अजूनही अपेक्षित प्रमाणात या अॅपवर पुस्तके उपलब्ध नाहीत, मात्र मराठीरीडर अॅप महिन्या-दोन महिन्यांच्या कालावधीमध्ये आणखी नवी पुस्तके वाचकांसमोर सादर करणार आहे.
साहित्य संमेलनानंतर काही नवी पुस्तके या अॅपवर उपलब्ध झाली आहेत. दर आठवड्याला नवीन प्रकारातील पुस्तक यामध्ये समाविष्ट करण्याचा प्रयत्न आहे. यामध्ये चरित्र, कादंबऱ्या, कथा, कविता, वैचारिक, बालसाहित्य अशा वैविध्यपूर्ण पुस्तकांचा समावेश आहे. मौजेची पुस्तकेही आतापर्यंत या अॅपवर उपलब्ध नव्हती. मात्र महिन्याभराच्या कालावधीत मौजेचीही विविध पुस्तके या व्यासपीठाच्या माध्यमातून वाचकांपर्यंत पोहोचतील. हे अॅप लोकांपर्यंत खऱ्या अर्थाने पोहोचायला अजून काही काळ जावा लागेल. मात्र याला सकारात्मक भविष्यकाळ आहे, अशी भावना रोहन प्रकाशनचे रोहन चंपानेरकर यांनी व्यक्त केली.
येत्या दोन महिन्यांच्या काळात आणखी १०० पुस्तके लवकरच अॅपवर अपलोड करण्यात येणार आहेत. या सहा प्रकाशकांव्यतिरिक्त इतर अनेक प्रकाशकांची पुस्तकेही या अॅपच्या माध्यमातून उपलब्ध करून देण्यात येणार आहेत. त्यांच्याशी हे व्यासपीठ संपर्कात आहे, अशी माहिती ज्योत्स्ना प्रकाशनचे मिलिंद परांजपे यांनी दिली. लोकांना अधिक प्रमाणात पुस्तके हवी आहेत. याबद्दल सातत्याने वाचकांशी संपर्क साधण्यात येत आहे. यामुळे छापील पुस्तकांपलीकडे जाऊन काही पुस्तके ई-बुक्स स्वरूपातच आणण्याबद्दलही विचार करता येईल, अशीही चर्चा या निमित्ताने सुरू झाली आहे.
दरम्यान, साहित्य संमेलनादरम्यान मराठीरीडर अॅपच्या स्टॉलवर आलेल्या सॉफ्टवेअर क्षेत्रातील काही वाचकांनी आम्ही काही मदत करू शकतो का, अशी विचारणाही केली. त्यामुळे प्रकाशकांना अधिक बळकटी मिळाल्याचे सांगण्यात येत आहे. हे अॅप डाऊनलोड करणाऱ्यांचा वयोगट महाविद्यालयीन तरुणांपासून पन्नाशीपर्यंत सर्वांचा आहे. परदेशातूनही अॅप डाऊनलोड करण्यात आले आहे. अॅपवर जशी पुस्तकांची संख्या वाढत जाईल, त्यासंदर्भातील माहिती ई-मेलच्या माध्यमातून वाचकांपर्यंत पोहोचवण्यात येणार आहे.