राज्यात मास्क सक्ती तूर्तास नाही; चीनसह परदेशांमध्ये करोनाचा पुन्हा प्रादुर्भाव

मुंबई : चीनमध्ये करोनासंसर्ग पुन्हा वाढत असल्याने देशासह राज्यात खबरदारीचा इशारा देण्यात आला आहे. मात्र मास्कसक्तीसंदर्भात निर्णय अद्याप घेण्यात आलेला नाही. यापूर्वी चीनसह परदेशांमध्ये करोनाचा पुन्हा प्रादुर्भाव झाला. या स्वरूपाच्या विषाणूच्या परावर्तित स्वरूपामुळे जेव्हा राज्यात फैलाव झाला तेव्हा तो नियंत्रणाबाहेर गेला नाही.

राज्यातील लसीकरण, समूहामध्ये निर्माण झालेली रोगप्रतिकारशक्ती, तसेच बूस्टर मात्रेचा एकत्रित परिणाम यांमुळे हा संसर्ग नियंत्रणात राहिला. सध्या काही देशांमध्ये संसर्गाचा फैलाव होत असेल तर राज्यामध्ये रुग्णसंख्येमध्ये वाढ होऊ नये यासाठी सर्व प्रतिबंधात्मक उपाययोजना करण्यात आल्या आहेत. मात्र मास्कची सक्ती करण्यात आलेली नाही. सहआजार असलेले, ज्येष्ठ नागरिक, गर्भवती महिला व लहान मुले यांनी गर्दीमध्ये वा संसर्गाची लागण होईल अशा ठिकाणी जाताना खबरदारी घेतली तर ते त्यांच्या आरोग्याच्या दृष्टीने योग्य राहील, असे राज्याचे साथ रोगसर्वेक्षण अधिकारी डॉ. प्रदीप आवटे यांनी सांगितले.