धि गोवा हिंदू असोसिएशनचा विशेष कार्यक्रम
म. टा. प्रतिनिधी, मुंबई
नाट्य, सामाजिक आणि शैक्षणिक क्षेत्रामध्ये कारकीर्द गाजवलेल्या धि गोवा हिंदू असोसिएशनने आपल्या कारकीर्दीची १०० वर्षे पूर्ण केली असून या शताब्दी महोत्सवाची सांगता रविवार २५ ऑगस्ट रोजी सकाळी ९.३० वाजता दादर माटुंगा सांस्कृतिक केंद्र येथे होणार आहे.
शतक महोत्सवी कार्यक्रम २५ ऑगस्टला दोन सत्रात होणार असून सकाळच्या सत्रात पद्मविभूषण डॉ. रघुनाथ माशेलकर यांच्याहस्ते 'स्मृतिग्रंथ' ह्या स्मरणिकेचे प्रकाशन होईल. यावेळी मोहनदास सुखटणकर, पंडित अरविंद पिळगांवकर, डॉ. अनिल कारपूरकर, ज्येष्ठ अभिनेते अशोक सराफ व सुमन तुलसियानी यांना संस्थेचे मानद सदस्यत्व देऊन गौरविण्यात येईल. यानंतर पद्मभूषण डॉ. नंदकिशोर लाड ऑर्थोपेडिक कॉम्प्लिकेशन्स रिलेटेड टू एजिंग या विषयावर माहितीपर सादरीकरण करतील. त्यानंतर पद्मविभूषण डॉ. रघुनाथ माशेलकर यांचे इनोव्हेशन अ वे ऑफ लाइफ या विषयावर व्याख्यान होईल.
दुसऱ्या सत्रात नाट्य गीत गायन स्पर्धेतील तीन विजेते आपली कला सादर करतील. त्यानंतर डॉ. नंदिनी देशमुख यांचे हवामान बदल आणि आपण यासंबंधी माहितीपर व्याख्यान होईल. या सोहळ्यासाठी गोव्याहून खास कलाकार आले आहेत. यामध्ये अजित पैंगणकर आणि सहकारी यांचे गोफ लोकनृत्य तर राजेंद्र देसाई आणि सहकारी दशावतारी कला सादर करतील. कार्यक्रमाची सांगता एक नंबरी एकांकिका स्पर्धेतील विजेत्या देव हरवला या एकांकिकेने होईल. शतक महोत्सवी कार्यक्रमांचा एक भाग म्हणून १० ऑगस्ट रोजी नाट्यगीत गायन स्पर्धेचे आयोजन करण्यात आले होते. त्यानंतर १७ ऑगस्ट रोजी १ नंबरी एकांकिका स्पर्धा झाली.