आज वाचकांचे देणे गुणवंताच्या हाती

‘मटा हेल्पलाइन’च्या चेक वितरणाचा कार्यक्रम

म. टा. खास प्रतिनिधी, मुंबई

हमाली करणारे वडील आणि स्वयंपाकाचे काम करणारी आई यांच्या कष्टाला उत्तर म्हणून डॉक्टर होण्याचे स्वप्न पाहणारी अश्विनी, आई-वडिलांचे छत्र हरपल्याने नातेवाईकांच्या घरी राहून भविष्याला आकार देणारी गौरी, झोपडपट्टीतील पोटमाळ्यावर अभ्यास करणारा स्वप्नील, दुसऱ्यांच्या शेतात मजुरी करणारी तनुजा, परीक्षाकाळात मानेवर आलेल्या टीबीच्या गाठीशी सामना करत भरारी घेणारा रोहित... असे मुंबई परिसर आणि कोकणातील विद्यार्थी. त्यांच्या डोळ्यात स्वप्नं आहेत, मेहनतीची तयारी आहे. मात्र, त्यासाठी आर्थिक पाठबळाची गरज होती. ‘मटा’च्या वाचकांनी दरवर्षीप्रमाणे ‘बळ द्या पंखांना’ या उपक्रमातून भरभरून मदत केली आहे.

‘मटा हेल्पलाइन’ उपक्रमाच्या माध्यमातून ‘मटा’च्या वाचकांनी केलेली आर्थिक आज विद्यार्थ्यांपर्यंत पोहोचेल. या कार्यक्रमासाठी मकरंद अनासपुरे आणि सोनाली कुलकर्णी उपस्थित राहणार आहेत. अपना सहकारी बँक या उपक्रमाची बँकिंग पार्टनर आहे. या बँकेचे अध्यक्ष दत्ताराम चाळके कार्यक्रमासाठी उपस्थित राहून या विद्यार्थ्यांचा गौरव करणार आहेत.

गेल्या नऊ वर्षांत वाचकांनी भरभरून प्रतिसाद देऊन या उपक्रमाला एका चळवळीचे रूप दिले आहे. दहाव्या वर्षीही त्याच उदात्त भावनेतून वाचक पुढे आले. आता वेळ आली आहे ही मदत प्रत्यक्ष त्या विद्यार्थ्यांच्या हाती देण्याची!

ठिकाण ः रुईया कॉलेजचे सभागृह, माटुंगा

दिनांक ः आज, बुधवार, २३ ऑगस्ट • वेळ ः सायं. ४ वाजता