म. टा. खास प्रतिनिधी, मुंबई
‘आठ बाय नऊ’चे घर, आजारी असणारे आजोबा, घरात अभ्यासासाठी पोटमाळ्यावरील छोटीशी जागा, सेकंडहँड पुस्तके-गाईड, परिसरात प्रचंड आवाज-गोंधळ अशा प्रतिकूल परिस्थितीत जोगेश्वरीतील गणेश पडवळने दहावीत ९५.२० टक्के मिळवून यश मिळविले आहे. सुरक्षारक्षक म्हणून काम करणारे वडील, धुणीभांडी करणारी आई यांच्या तुटपुंज्या कमाईत दहावीपर्यंतचा गाडा खेचलेल्या गणेशला डॉक्टर होण्याची महत्त्वाकांक्षा आहे.
जोगेश्वरी पूर्वेतील म्हाडा कॉलनीतील संभाजीनगर परिसरात गणेश पडवळ आणि कुटुंबीय राहते. गणेशने दहावीत ९५.२० टक्के मिळवून जोगेश्वरीतील श्रमिक शाळेत पहिला क्रमांक पटकाविला आहे. गणेशचे वडील एकनाथ पडवळ हे गोरेगाव पश्चिमेकडील नेस्को संकुलात सुरक्षारक्षक आहेत. त्यांना महिन्याला साधारण ९ हजार रुपये इतका पगार आहे. गणेशची आई घराला आर्थिक मदत म्हणून काही ठिकाणी धुणीभांडी करून महिन्याला दोन-एक हजार रुपये मिळविते. अशा स्थितीत डॉक्टर होण्याची इच्छा असणाऱ्या गणेशचे पुढील शिक्षण कसे करायचे हा मोठा प्रश्न आहे.
आठ बाय नऊच्या छोट्याशा घरात आई-वडील, गणेशचा सातवीत शिकणारा लहान भाऊ, आजोबा असे कुटुंब राहते. आजोबा आजारी असल्याने त्यांच्या औषधोपचारांचा खर्चही आलाच. गावी जमीनजुमला वा कोणताही व्यवसाय नसल्याने उत्पन्नाचे अन्य साधनही नाही. छोट्याशा घरात पोटमाळा असून तिथली छोटीशी जागा म्हणजे गणेशची ‘स्टडीरुम’. गणेशची उंचीही जास्त असल्याने पोक काढूनच तिथे बसावे लागते. नवीन पुस्तके परवडत नसल्याने त्याला नेहमीच सेकंडहँड पुस्तकांचा आधार मिळाला. तीच गत गाईड्सची असल्याचेही तो सांगतो. शाळेतील शिक्षकांपासून सर्वांनीच वेळोवेळी मार्गदर्शन केले तर, त्याची हुशारी पाहून खासगी क्लासचालकांनी त्यास सूट दिली. गणेशप्रमाणेच त्याचा लहान भाऊ संदेश हादेखील अभ्यासात हुशार असून त्याला सातवीत ९२ टक्के गुण मिळाले आहेत.
‘आठ बाय नऊ’चे घर, आजारी असणारे आजोबा, घरात अभ्यासासाठी पोटमाळ्यावरील छोटीशी जागा, सेकंडहँड पुस्तके-गाईड, परिसरात प्रचंड आवाज-गोंधळ अशा प्रतिकूल परिस्थितीत जोगेश्वरीतील गणेश पडवळने दहावीत ९५.२० टक्के मिळवून यश मिळविले आहे. सुरक्षारक्षक म्हणून काम करणारे वडील, धुणीभांडी करणारी आई यांच्या तुटपुंज्या कमाईत दहावीपर्यंतचा गाडा खेचलेल्या गणेशला डॉक्टर होण्याची महत्त्वाकांक्षा आहे.
जोगेश्वरी पूर्वेतील म्हाडा कॉलनीतील संभाजीनगर परिसरात गणेश पडवळ आणि कुटुंबीय राहते. गणेशने दहावीत ९५.२० टक्के मिळवून जोगेश्वरीतील श्रमिक शाळेत पहिला क्रमांक पटकाविला आहे. गणेशचे वडील एकनाथ पडवळ हे गोरेगाव पश्चिमेकडील नेस्को संकुलात सुरक्षारक्षक आहेत. त्यांना महिन्याला साधारण ९ हजार रुपये इतका पगार आहे. गणेशची आई घराला आर्थिक मदत म्हणून काही ठिकाणी धुणीभांडी करून महिन्याला दोन-एक हजार रुपये मिळविते. अशा स्थितीत डॉक्टर होण्याची इच्छा असणाऱ्या गणेशचे पुढील शिक्षण कसे करायचे हा मोठा प्रश्न आहे.
आठ बाय नऊच्या छोट्याशा घरात आई-वडील, गणेशचा सातवीत शिकणारा लहान भाऊ, आजोबा असे कुटुंब राहते. आजोबा आजारी असल्याने त्यांच्या औषधोपचारांचा खर्चही आलाच. गावी जमीनजुमला वा कोणताही व्यवसाय नसल्याने उत्पन्नाचे अन्य साधनही नाही. छोट्याशा घरात पोटमाळा असून तिथली छोटीशी जागा म्हणजे गणेशची ‘स्टडीरुम’. गणेशची उंचीही जास्त असल्याने पोक काढूनच तिथे बसावे लागते. नवीन पुस्तके परवडत नसल्याने त्याला नेहमीच सेकंडहँड पुस्तकांचा आधार मिळाला. तीच गत गाईड्सची असल्याचेही तो सांगतो. शाळेतील शिक्षकांपासून सर्वांनीच वेळोवेळी मार्गदर्शन केले तर, त्याची हुशारी पाहून खासगी क्लासचालकांनी त्यास सूट दिली. गणेशप्रमाणेच त्याचा लहान भाऊ संदेश हादेखील अभ्यासात हुशार असून त्याला सातवीत ९२ टक्के गुण मिळाले आहेत.