उत्सुकता…‘मटा सन्मान’ सोहळ्याची!

म. टा. प्रतिनिधी, मुंबई

‘महाराष्ट्र टाइम्स’चे वाचक आणि मराठी चित्रपट आणि नाट्यसृष्टी वर्षभर ज्या सोहळ्याची वाट पाहते तो ‘मटा सन्मान सोहळा’ अवघ्या काही दिवसांवर आला आहे. या सोहळ्यामध्ये कलाकारांसोबत लेखक, गीतकार आणि तंत्रज्ञांचाही सन्मान केला जातो. यंदा एकूण ३६ श्रेणींमध्ये कलाकार आणि तंत्रज्ञांना सन्मानित करण्यात येणार आहे. चित्रपट, मालिका आणि नाटक अशा मुख्य भागांमध्ये हे पुरस्कार दिले जाणार असून, व्यावसायिक नाटकांसोबत प्रायोगिक नाटकांचीही या पुरस्कार सोहळ्यामध्ये आवर्जून दखल घेतली जाते.

चित्रपट विभागात सैराट, नटसम्राट आणि व्हेंटिलेटर या तीन चित्रपटांना सर्वोत्कृष्ट चित्रपटासाठी मानांकन मिळाले आहे. नागराज मंजुळे, महेश मांजरेकर आणि राजेश मापुसकर सर्वोत्कृष्ट दिग्दर्शकाच्या पुरस्काराच्या स्पर्धेत आहेत. सर्वोत्कृष्ट अभिनेता या पुरस्कारासाठी नाना पाटेकर, मकरंद अनासपुरे आणि आकाश ठोसर यांना मानांकन मिळाले आहे, तर सर्वोत्कृष्ट अभिनेत्रीसाठी मेधा मांजरेकर, रिंकू राजगुरू आणि समिधा गुरू स्पर्धेत आहेत.

टीव्ही विभागामध्ये अस्सं सासर सुरेख बाई, दुहेरी आणि तू माझा सांगाती या तीन मालिका सर्वोत्कृष्ट मालिकेच्या स्पर्धेत आहेत. टीव्ही विभागासाठी संतोष जुवेकर, उपेंद्र लिमये आणि प्रफुल्ल भालेराव यांना सर्वोत्कृष्ट अभिनेत्यासाठी मानांकने मिळाली आहेत. सर्वोत्कृष्ट अभिनेत्री गटात दीप्ती भागवत, नेहा जोशी आणि सुपर्णा शाम टीव्ही विभागात स्पर्धेत आहेत. सर्वोत्कृष्ट दिग्दर्शक म्हणून संचित वर्तक, मनीष खंडेलवाल, श्रीप्रसाद गोखले आणि दीपक नलावडे यांना मानांकन मिळाले आहे.

‘मटा सन्मान २०१७’ हा सोहळा २७ मार्च रोजी विलेपार्ले येथील भाईदास सभागृहात पार पडेल. ‘मटा सन्मान’ सोहळ्याची तिकिटे ticketees.comवर उपलब्ध आहेत. तिकिट खरेदीसाठी ९१६७७११६४९ या क्रमांकावरही फोन करता येईल.


तिकिटे खालील ठिकाणी उपलब्ध आहेत.

> भाईदास हॉल, मिठीबाई कॉलेजच्या शेजारी, विलेपार्ले पश्चिम (सकाळी १० ते सायं. ७)

> दीनानाथ मंगेशकर नाट्यगृह, अगरवाल मार्केट, विलेपार्ले स्टेशनसमोर, विलेपार्ले पूर्व (सकाळी १० ते सायं. ७)

> महाराष्ट्र टाइम्स, शिवानंद सोसायटी, भास्कर कॉलनी, ठाणे (प.). (सकाळी १० ते सायं. ७)

> महाराष्ट्र टाइम्स, चौथा मजला, टाइम्स टॉवर, कमला मिल कम्पाऊंड, सेनापती बापट मार्ग, लोअर परळ (प.), मुंबई

> टाइम्स ऑफ इंडिया, डॉ. डी. एन. मार्ग, सीएसटीसमोर, फोर्ट, मुंबई (सकाळी १० ते सायं. ७)